Комисијата за заразни болести утрово донесе предлог одлука за отворање на границите со Србија, Црна Гора, Косово и Албанија без ПЦР тестирање, информира Министерството за здравство.
Според анализите, во моментов нема индикација, односно нема висок број на импортирани случаи во земјава со КОВИД-19 од овие земји. Согласно тоа, нема ризик и безбедно е отворањето на границите.
Во Европската Унија, се додава в соопштението од Министерството за здравство, сите граници на движење се без ПЦР тестирање.
Предлог одлуката ќе биде доставена до Владата на Република Македонија.
Како што објавивме откако за неколку дена во Македонија се регистрирани повеќе од 600 новозаразени со коронавирус, Владата синоќа усвои нови мерки за смирување на состојбата. Мерките се потивка музика во угостителските објекти, без пејачи и диџеи, и седење на маса по 4 наместо како досега по 12 лица.
Ваквите мерки се помалку чудни: од една страна Владата ги заострува мерките, а од друга подготвува отворање на границите без тестови за коронавирус.
