Полицијата во Никшиќ денеска приведе четири лица, во чие возило е пронајдено оружје, дрога, палка, метален бокс, железни кугли, рачни спрејови и заштитни маски, соопшти Управата на полицијата.
Со соопштението се наведува дека приведените лица изјавиле дека тргнале кон Цетиње за да присуствуваат на протестот поради најавеното устоличување на митрополитот црногорско-приморски Јоаникије в недела на 5 септември.
За настанот е известен државниот обвинител, кој наложил едно од лицата да биде уапсено поради сомнеж дека извршило кривично дело недозволено поседување оружје и експлозивни материјали, а против друго лице да се поднесе кривична пријава за неовластено производство и пуштање во промет на наркотични дроги.
Тензиите дрстично се зголемија во Црна Гора поради најавеното устоличување, на кое остро се противат црногорските национални организации, здруженија и речиси сите опозициски парламентарни партии, кои најавуваат граѓански протести. Присуство на протестите поради устоличувањето на митрополитот Јоаникије најави и претседателот на Црна Гора, Мило Ѓукановиќ, а се очекува голем број граѓани да се соберат во Цетиње.
