Најдобриот стрелец во редовите на Борусија Дортмунд, Ерлинг Халанд, е подготвен да се врати во натпреварувачки ритам, откако изминатите пет недели беше надвор од теренот поради повреда на бутниот мускул.
Тренерот на второпласираниот тим во Бундеслигата, Марко Росе, потврди за германските медиуми дека норвешкиот напаѓач ќе биде со екипата за денешниот дуел на гостински терен против Волфсбург.
– Ерлинг ќе биде во автобусот со нас. Изминатите неколку денови покажа видлив напредок. Добро се чувствува, но најмногу што може да очекувате е негов краткотраен престој на теренот, најави Росе.
Халанд последен пат настапи на 19 октомври во поразот на Борусија на гостувањето кај Ајакс (0:4) во Лигата на шампиони. Дотогаш, на шест натпревари во Бундеслигата постигна девет голови и еден во Лигата на шампиони.
