МИЦКОСКИ: Не може веќе да влегуваат голтари во политиката, а да излегуваат како милионери

Лидерот на ВМРО-ДПМНЕ Христијан Мицкоски, вечерва гостуваше на телевизија Канал 5 каде меѓудругото потенцира дека тој е и ќе биде првиот кој ќе се заложи да ги снема од политичката сцена сите оние политичари за кои има сомненија дека се богатат на грбот на граѓаните без разлика дали тие се од ВМРО-ДПМНЕ или од било која друга партија.

-И кај мене во партијата, во ВМРО-ДПМНЕ ако се појави било какво девијантно однесување во таа насока, јас ќе бидам првиот кој што ќе се заложи тоа да биде отстрането, без разлика дали е на локално или на централно ниво а не пак ДУИ да го прави тоа, јас некого не штитам, никого не амнестирам, рече Мицкоски.

Тој додаде и дека модерните политичари се луѓе кои работат чесно и отчетно и транспарентно за народот

-Модерните политичари се луѓе кои работат чесно и отчетно и транспарентно за народот. Не може веќе да имаме политичари бизнисмени, заврши тоа време кога влегуваа голтари во политика а излегуваа милионери, тоа народот го препознава, такви примери има многу во сите партии а не само во една или во друга. И тука немојте да мислите дека јас ќе имам компромис со таа работа. Мораме на граѓаните да има вратиме довербата во системот, во институциите. И тука да немате дилема, затоа што денеска граѓаните се чувствуваат обесправени, се чувствуваат демотивирани затоа што практично се оставени без помошни, гледаат дека институциите не функционираат, дека нема владеење на право, дека има многу корупција и криминал. Дневно разговарам со неколку бизнисмени кои што доаѓаат и ги кажуваат процентите во различни институции кои што се приморани да ги плаќаат ако сакаат да добијат работа, порача Мицкоски.

Што се однесува до средбата со Ковачевски, тој истакна:

Нема уште прецизен термин. Имаше еден колоквијален разговор, би сакал да организираме средба, во ред реков да организираме, кабинетите нека договорат термин. Нема ништо од нивна страна. Така што тоа е тоа. Тој е тој што рече ќе викнал. Ете ја користам оваа прилика во вашата емисија да дојде на лидерска средба во седиштето на ВМРО-ДПМНЕ, рече Мицкоски.