Владини функционери од ДУИ, пратеници и градоначалници од оваа партија денеска празнуваа и го славеа 28 Ноември – Денот на албанското знаме, иако во Македонија тој датум не е на списокот на државни празници.
Пратеници и функционери од ДУИ денеска наместо на комисиски расправи и во министерските кабинети, наместо на работа, присуствуваа на почетокот на реконструкцијата на Универзитетот „Мајка Тереза“, по што цела пратеничка група, претседателот на Собранието Талат Џафери, како и речиси сите министри присуствуваа на свечената академија во хотелот „Александар палас“, објави Слободен печат.
Работните обврски и на градоначалниците во општините со мнозинство Албанци, како Чаир, Кичево, Сарај, Арачиново… беа во втор план, бидејќи главно беше одбележувањето на Денот на знамето и независноста на Албанија. Во општините со мнозинство Албанци се вееше албанското, но не и државното знаме, што е спротивно на Законот за употреба на знамињата на заедниците. Исклучок беше само свечената академија во „Александар палас“ каде што беа истакнати албанското, државното знаме, како и знамињата на САД и на ЕУ.
Одбележувањето на националниот празник на Албанија, Ахмети, во друштво на првиот вицепремиер Артан Груби, го почна во Шипковица каде што ја откри бистата на загинат припадник на ОВК од тоа село, Џемил Абдурахмани. Лидерот на ДУИ им го честита 28 ноември на сите Албанци со порака дека албанското знаме никогаш не било свиткано, бидејќи е натопено со крв.
