Во Општина Аеродром се уште се во тек разговори за изградбата на објектот кај Мајчин дом, за кој, актуелниот градоначалник Златко Марин вети дека по доаѓањето на власт ќе ја стопира изградбата. Сега, како што велат од општината, во интерес на граѓаните, се уште се бара решение.

Обесштетувањето на инвеститорот, како што наведуваат е неразумно бидејќи ќе предизвика крах на општинскиот буџет, а за давањето заменска парцела Општината е доведена во незавидна позиција бидејќи со донесениот ДУП во Аеродром нема друга соодветна парцела.

– Разговорите во однос на изградбата на објектот кај Мајчин дом се сѐ уште во тек. Се прави сѐ да се најде решение во интерес на граѓаните. Општината останува на ставот дека тука не треба да се гради. Во изминатите две недели заедно со другите институции и Град Скопје се разгледуваат сите можни опции“, изјави градоначалникот Златко Марин.

Во соопштението од Општината се појаснува дека како што беше најавено, прво се бараше друга парцела, односно заменска парцела, каде инвеститорот би можел да гради. Притоа, наведуваат, разгледани се сите можностите во општината, односно парцели во помалку урбанизираните делови од Аеродром, а во соработка со Град Скопје и Министерство за транспорт е барано решение и надвор од територијата на Аеродром.

– Проблемот, наведуваат од Општината, е што минатото раководство на Аеродром, направи измени во ДУП-от со кој впиша голема маркица за градба и со тоа цената на земјиштото вртоглаво пораснала. Сега, во Аеродром немаме друга соодветна парцела која може да ја замени оваа, соопштуваат од општината.

Во однос на втората можност е да се направи обесштетување, наведуваат, дека се прават процени и во општината  и кај самиот инвеститор.

– Од досегашните анализи, сумите се огромни. Само за трошоците за земјиште и комуналии треба да му се вратат околу 5,5 милиони евра. Дополнително, инвеститорот ќе бара оштета за досегашни инвестиции, за одржување и кредити кои според информациите кои тој ги пласира во јавноста се многу високи. Доколку се оди во насока на обештетување, инвеститорот би можел да побара сума и двојно поголема од првичните 5,5 милиони евра. Ова би значел комплетен крах на буџетот на општина Аеродром и огромни штети за граѓаните на нашата општина. Ваквото решение би бил многу неразумно бидејќи ќе се доведе во прашање реалзицијата на сите проекти, но и тековното работење, истакнуваат од Општина Аеродром.

Во меѓувреме, Општина Аеродром, како што наведуваат, е во исчекување на одлуката од Уставен суд, каде се поднесени 13 претставки за ДУП И10, што ја опфаќа парцелата кај Мајчин дом.

Инаку, граѓаните паметат дека едно од големите предизборни ветувања на СДСМ и градоначалникот Златко Марин беше повеќе зеленило во Аеродром, а момалку бетон и стриктно ветување дека ако Марин стане градоначалник ќе спречи изградба на објект кај Мајчин дом.