Премиерот Зоран Заев денеска изјави дека се уште немал телефонски разговор со неговиот грчки колега Алексис Ципрас во врска со евентуалниот договор за прашањето за името.
– Во тек се разговорите на работните групи околу одредени технички детали, рече Заев, кој присуствуваше на почетокот на градежните работи за изградба на експресен пат Радовиш – Штип.
Засега, како што посочи, не сака да ги коментира информациите што ги пласираат грчките медиуми во однос на предлогот Република Северна Македонија.
Останува неизвесно дали и кога Заев ќе се слушне со неговиот грчки колега Алексис Ципрас и дали како што беше најавувано може да се дојде до решение за спорот и нивна средба во Преспа, откако неименуван преставник на грчката Влада изјавил дека „по се изгледа се оддалечува можноста за договор во следните денови за решавање на спорот со името, коментира претставник на грчката Влада“.
Како што јави МИА од Атина, според истиот владин претставник чија изјава ја пренесе грчката агенција АНА-МПА се оддлечува и можноста за телефонски разговор меѓу Заев и Ципрас.
– ПЈРМ очигледно сe уште не е подготвена да се одговори на она што беше договорено во Брисел меѓу двајцата министри за надворешни работи. Според тоа можноста за договор во текот на следните денови се чини дека се оддалечува, рекол претставникот на грчката влада.
По ова македонската Влада повика на одговорно политичко однесување на двете страни.
– Во овие моменти не треба да се подлегнува на шпекулации. Одговорното политичко однесување на сите политички фактори во двете земји е од најголема корист и во интерес на изнаоѓање решение, изјавија вчера од Владата, како одговор во врска со коментарот на грчкиот владин претставник.
Премиерот Заев, вчера во македонското Собрание побара од опозицијата да не шпекулира за разговорите за името
– Немојте да шпекулирате дека некој нешто прави во четири очи. Зоран Заев секогаш кога разговарал соопштувал во јавноста. Никола Димитров секогаш кога разговарал соопштувал во јавноста. Секој документ што е создаден на формален состанок стои во архивите, на МНР, во Влада, кај претседателот на државата, истакна Заев од парламентарната говорница предупредувајќи ги пратениците од опозицијата.
Вчера претседателот Ѓорге Иванов побара од Заев да му го достави предлогот за водење на преговори со уставна основа, нацртот на договорот, како и ставовите на делегацијата во водењето на преговорите.
– Во недостиг на клучни документи, а со цел обезбедување на поширок консензус за прашањето за името, претседателот на Република Македонија Ѓорге Иванов го охрабрува претседателот на Владата на Република Македонија Зоран Заев да ги достави предлогот за водење на преговори со уставна основа, нацртот на договорот, како и ставовите на делегацијата во водењето на преговорите, се вели во соопштението од кабинетот на претседателот.
Иванов останува на ставот дека не прифаќа решение за прашањето за името за севкупна употреба.
Последните случувања на релација Скопје – Атина, постојано се во фокусот на медиумите во Грција, а новинарите прогнозираат, повикувајќи се на свои извори дека „Република Северна Македонија“ е името кое што е во предност во однос на останатите предлози на медијаторот („Република Нова Македонија“, „Република Горна Македонија“, „Република Вардарска Македонија“ и „Република Македонија (Скопје)“ – предлог одбиен од грчката страна).
Сепак, исто како и од македонска, така и од грчка страна нема официјална потврда кое е името за кое што се согласиле двете земји.
