НАПАД ВО ГЕРМАНИЈА: Убиени најмалку 3 лица во Солинген, 8 се повредени, полицијата трага по напаѓачот кој се уште е во бегство

Три лица загинаа ноќеска откако маж нападна случајни минувачи на градскиот фестивал во германскиот град Солинген, објави весникот „Билд“. Сторителот побегнал од местото на злосторството.

Полицијата презеде голема акција за негово апсење.

Како што пренесува „Солинген тагеблат“, еден од организаторите на фестивалот изјавил дека спасувачката служба се бори за животи на девет души.

Солинген викендов го слави својот 650 роденден со „Фестивалот на различностите“.

Германската полиција се уште трага по напаѓачот кој со нож уби три лица во Солинген

Германската полиција денеска продолжи со потрагата по лицето одговорно за нападот со нож што се случи синоќа на прославата на 650-годишнината од градот Солинген.

Во нападот во петокот вечерта загинаа најмалку три лица – една жена и двајца мажи, а осум се повредени, од кои пет потешко, соопштија властите. Не беа дадени информации за идентитетот на повредените или нивната моментална состојба, јави ДПА.

Напаѓачот се уште е во бегство, соопшти деенска полицијата, а потрагата продолжува. Специјалните единици трагаа по напаѓачот во градот.

Полицијата ги предупреди жителите кои забележуваат се што е сомнително да не дејствуваат самоиницијативно, туку да се јават на полицискиот број за итни случаи.

„Во моментов немаме индиции за тоа каде се наоѓа“, изјави портпаролот на полицијата. Нема ниту опис на осомничениот.

Напаѓачот успеал да побегне поради паниката што се проширила по прободувањето, изјави портпаролот на Министерството за внатрешни работи на Северна Рајна Вестфалија. Северна Рајна Вестфалија е најнаселената покраина во Германија.

„Мислам дека тоа е нашиот огромен проблем. Се уште немаме многу информации за сторителот“, изјави Александар Креста, портпарол на полицијата во Вупертал.

Според полицијата, напаѓачот нападнал случајни минувачи, избирајќи ги своите жртви по случаен избор.

Нападот започнал околу 21:45 часот (19.45 по Гринич) во петокот, соопшти полицијата. Бил извршен во центарот на градот каде што била поставена сцена за музика во живо за настанот Фестивал на различностите. Злосторството се случило непосредно пред бината, јави ДПА.

фото: ДПА