Премиерот Зоран Заев потврди дека попладнево во 16 часот ќе во Владата ќе има средба со Билал Касами од Беса, во рамки на консултациите со политичките партии за обезбедување двотретинско мнозинство за уставните измени.
-Двете опозициски партии од албанскиот блок досега беа конструктивни во однос на процесот на уставни измени. Дел од нивните сугестии се вградени. Очекувам од Касами да слушнам што ја загрижува БЕСА, нејзините гласачи и поддржувачи, рече на денешната прес-конференција Заев, одговарајќи на новинарско прашање.
Тој потенцираше дека разговара со сите политички партии без разлика дали се власт или опозиција, во, како што рече, функција на прифаќање на уставните измени.
-Денешнта средба со Касами е договорена пред Нова година. Сите политички партии силно го поддржуваме процесот на евроатланските интеграции, но со нив ќе разговараме и за оние работи за кои имаат резерви, рече македонскиот премиер.
Заев вчера изјави дека ќе стори се да обезбеди двотретинско мнозинство за поддршка на уставните амандмани, на пленарната седница. Тој е оптимист дека процесот ќе заврши успешно, и порано од предвидениот датум за гласање на амандманите, планиран за 15 јануари, бидејќи опозициската ВМРО-ДПМНЕ одлучи да не учествува во расправата, но и дека поддршката со број на пратеници ќе се знае на чинот на гласањето.
-Ќе сторам се до последен момент да обезбедиме двотретинско мнозинство и тоа ќе го соопштиме на јавноста во моментот на гласањето, или ќе споделиме задоволство од тоа што е постигнато или ќе ја понесеме одговорноста на целиот фокус што го дадовме на интеграциите, дополни Заев.
Најави дека наредните денови покрај со Касами ќе има средба и со Зијадин Села од Алијансата на Албанците. Од двајцата како недвојбени поддржувачи на интеграциските процеси на Македонија, рече, очекува сериозност и одговорност.
Третата и последна фаза од имплементацијата на Преспанскиот договор почнува следната недела, на 9 јануари, кога е закажана собраниската седница за усвојување на уставните измени. Текстот на амандманите на Уставот на предлог на Владата за да поминат треба да бидат поддржани од најмалку две третини од пратениците во законодавниот дом.
