Албанскиот премиер Еди Рама смета дека ЕУ треба да разговара со Русија, а не да ја „делегира својата надворешна политика на Вашингтон, бидејќи Москва е сосед на Унијата, а не на САД”.
„Кога станува збор за Европската Унија, мислам дека треба да разговара со Русија. И не треба да продолжи да ја делегира својата надворешна политика на Вашингтон, бидејќи на крајот на краиштата, Русија е сосед на Европската Унија, а не сосед на САД. А со соседите мора да се разговара“, рекол Рама, во подкаст „East Side Stories“ на австрискиот медиум „Ди Пресе“.
Што се однесува на односите на Албанија со други земји, вклучително и Русија, Рама изјавил дека „Албанија е мала земја и не го напушта луксузот да избира во однос на односите со други странски земји“.
„Кога станува збор за нас, мислам дека сме премногу мали за да избираме. Затоа, треба да разговараме со сите и да можеме да ги разбереме сите колку што е можно повеќе. Кога станува збор за Русија, имаме многу посебен однос поради посебната историја. Значи, раскинавме со Русија во 1960 година затоа што сакавме да го задржиме Сталин, тие сакаа да се ослободат од Сталин. И тоа се случи. Го задржавме Сталин, а не Советскиот Сојуз во следните 30 години, нагласил тој, објавија албанските медиуми.
Тоа, според него, создало многу големо незадоволство во психологијата на албанскиот народ кон Русите и Русија.
„Затоа по 35 години, да речеме, демократски живот, никогаш не сме биле во посета на Русија и не сме биле посетени од Русија. И, искрено, не ни недостига. Но, повторувам, кога станува збор за Европската Унија, мислам дека Европската Унија треба да разговара со Русија, бидејќи Москва е сосед на Унијата, а со соседите мора да се разговара, нагласил Рама.
