Аргентина и САД вчера објавија склучување на сеопфатен трговски договор, поттик за аргентинскиот претседател Хавиер Милеи во неговите напори да ја отвори традиционално протекционистичката економија на јужноамериканската земја. Договорот, исто така, го одразува блискиот сојуз меѓу радикалниот либертаријанец и американскиот претседател Доналд Трамп, објавија американските медиуми.
Министерот за надворешни работи на Аргентина, Пабло Кирно, објави селфи на социјалните мрежи со неколку аргентински дипломати по состанокот во Вашингтон, каде што, како што рече, е потпишан пактот.
„Честитки до нашиот тим и благодарност до тимот на Канцеларијата на трговскиот претставник на САД за заедничкото градење на овој одличен договор“, напиша Кирно.
Склучувањето на договорот беше потврдено и од Канцеларијата на трговскиот претставник на САД.
Рамковниот договор меѓу двете земји беше објавен минатиот ноември. Според него, Аргентина ќе ги ублажи ограничувањата за низа американски увози, вклучувајќи добиток, млечни производи, лекови, хемикалии, машини, медицински помагала и возила. Од друга страна, САД треба да ги елиминираат реципрочните царини за увоз на „одредени недостапни природни ресурси“ и фармацевтски состојки од Аргентина.
Се очекува Милеи да се појави во клубот на Трамп „Мар-а-Лаго“ следната недела, каде што е предвидено да одржи говор на гала вечера.
Трамп минатата година ја поддржа фискалната програма на Милеи со кредитна линија од 20 милијарди долари, што ги смири пазарите и ги подобри изгледите на Милеи на клучните избори за Конгресот минатиот октомври.
Вонредната интервенција предизвика критики од двете страни на американскиот политички спектар. Базата на Трамп во МАГА ја доведе во прашање потребата од спасување на далечна земја која не само што е од мало значење за Соединетите Американски Држави, туку и директно се натпреварува со американскиот извоз на пченка, пченица, месо и масло.
Од друга страна, демократските пратеници изразија негодување што Трамп инвестира пари од даночните обврзници во она што го сметаат за политички подарок за идеолошки сојузник. Критиките продолжуваат, па затоа американската сенаторка Елизабет Ворен, водечкиот демократ во Банкарскиот комитет на Сенатот, го повика секретарот за финансии Скот Бесент во четврток да ја откаже кредитната линија од 20 милијарди долари.
Во писмото, таа наведува дека иако Министерството за финансии ветило дека нејзината кредитна линија за Аргентина „е за акутна, краткорочна и итна цел, се чини дека … ја оставило отворена можноста за понатамошна употреба“.
