Претседателот на Турција, Реџеп Тајип Ердоган, изјави дека неговата земја инсистира претседателот на САД, Доналд Трамп, да го исполни ветувањето дадено на Турција во рамките на програмата за продажба на борбените авиони од петтата генерација Ф-35, пренесува телевизијата „Си-Ен-Ен Турк“.
Според медиумот, Ердоган изјави дека потпишувањето на трилатералниот договор од Мека меѓу Турција, Саудиска Арабија и Пакистан е чекор од голема важност и посочил дека „потпишувањето на овој трилатерален договор меѓу Саудиска Арабија, Турција и Пакистан во Мека беше суштински повод да се испрати важна порака до светот“.
– Очекуваме господинот Трамп да го исполни своето ветување за авионите Ф-35. Тој ни даде ветување за Ф-35 и неговото исполнување е од значење за Турција, очекуваме тоа ветување да се одржи – истакна Ердоган.
„Си-Ен-Ен Турк“ одбележува дека во интервју за арапската телевизија „Ал Џазира“, со седиште во Доха, шефот на државата даде оценка за актуелните прашања од дневниот ред. Подвлекувајќи дека интервјуто го дал на денот кога се одбележува 25-годишнината од основањето на Партијата на правдата и развојот (АКП), Ердоган изјави: „За нас е вистинска среќа да се собереме на таков ден. Покрај прославата на 25-годишнината, се надевам дека ќе продолжиме напред кон уште многу четвртвекови“.
Во интервјуто тој се осврна и на неодамна потпишаниот трилатерален договор од Мека во областа на одбраната.
„Пред сè, Пактот од Мека беше поинаква промена. Потпишувањето на овој трилатерален договор во Мека меѓу Саудиска Арабија, Турција и Пакистан даде повод да упатиме важна порака до светот. Остварувањето на овој договор во ваков трилатерален формат во Мека ни даде дополнителна сила и испрати специјална порака до светот. Верувам дека Пакистан, Турција и Саудиска Арабија ги завршија овие преговори со исклучително големо задоволство. Нека биде за добро“, посочи Ердоган.
Тој исто така истакна дека склучувањето на ваков договор во период на тензии меѓу САД и Иран го гледа како важен сигнал за светскиот мир.
„Велам важен чекор за светскиот мир, бидејќи за Турција, како земја што зазема позиција во поддршка на мирот, изборот на Мека беше важен чекор во таа насока. Во процесот меѓу Иран и САД, ние, како поддржувачи на мирот, постојано го подвлекувавме тоа и објаснувавме дека сме на страната на мирот. Како држави што се стремиме токму кон таков миротворен процес, ние — Пакистан, Турција и Саудиска Арабија — го зазедовме своето место како заштитници на мирот. Како такви и во иднина ќе продолжиме по тој пат како земји кои се стремат кон мирот“, ги пренесува неговите зборови телевизискиот канал.
На почетокот на јули, американскиот претседател Доналд Трамп на Самитот на НАТО објави дека Турција ќе купи воени авиони Ф-35 од САД. Претходно, САД ѝ наметнаа санкции на Турција и ја исклучија од програмата за авионите од петтата генерација Ф-35, откако во 2019 година Анкара набави руски системи за воздушна одбрана С-400.
МИА
