Опасна супербактерија отпорна на лекови сè побрзо се шири во европските болници, се пренесува од пациент на пациент и сè потешко се лекува, предупреди Европскиот центар за превенција и контрола на болести (ЕЦДЦ), пренесе Политико.
Инфекциите предизвикани од оваа бактерија, чиј број постојано расте во последниве години, претставуваат сериозна закана за пациентите во болниците и имаат висока стапка на смртност, која обично се движи меѓу 40 и 70 отсто. Анализите покажаа дека неколку нејзини соеви стануваат отпорни на речиси сите антибиотици, вклучувајќи ги и новите, и можат да предизвикаат тешки заболувања и смрт.
Наодите за клебсиела пневмонија се „најголемата причина за загриженост“ меѓу сите податоци за супербактериите во Европа собрани во текот на изминатата година, изјави Кристијан Гиске, кој ја раководи оваа работа во ЕЦДЦ.
Тоа е еден пример за опасноста од антимикробната резистенција — способноста на бактериите и габите да развијат отпорност на лековите наменети да ги уништат. Се проценува дека таа годишно одзема 35.000 животи во ЕУ, Исланд и Норвешка. „Тоа е голема закана за јавното здравје во Европа“, рече Гиске, пренесе Политико.
И покрај напредокот во одделни области, најновите извештаи покажаа дека ЕУ и понатаму е далеку од исполнувањето на целите за 2030 година за намалување на инфекциите отпорни на лекови. Меѓу предизвиците е и ограничениот број нови лекови за лекување на ваквите инфекции.
Оваа вест доаѓа во време кога се очекува новите европски фармацевтски прописи да бидат потпишани и да стапат во сила во декември. Тие вклучуваат мерки за поттикнување на откривањето и развојот на нови антибиотици, преку поволности за фармацевтската индустрија, како продолжување на пазарниот монопол, и преку редовни плаќања со кои државите би ги набавувале лековите.
Тешко се сузбиваат
Бидејќи се пренесува од пациент на пациент, зголемената зачестеност на инфекциите со клебсиела бара посилни мерки за спречување и контрола на инфекциите во болниците, предупреди ЕЦДЦ. Тоа подразбира подобра хигиена на рацете, правилна употреба на личната заштитна опрема, како ракавиците, и ефикасно чистење и дезинфекција на просториите.
Слични мерки помогнаа значително да се намали зачестеноста на инфекциите со попознатата болничка супербактерија МРСА. Но кај клебсиелата, дури и најмал пропуст при чистењето може да доведе до нејзино ширење.
„Клебсиелата е цревна бактерија и можеби има посилни резервоари во организмот“, рече Гиске пред новинарите на прес-конференцијата.
„Она што делува против МРСА можеби нема да биде доволно за клебсиелата. Добрата превенција и контролата на инфекциите мора да се спроведуваат уште подоследно за да се стави под контрола еден проблем како овој“, додаде тој.
Земјите успеаја да се справат со инфекциите предизвикани од МРСА, позната и како златна стафилокока отпорна на лекови. Во 2025 година бројот на инфекциите на крвотокот предизвикани од оваа бактерија беше за 19 отсто помал отколку во 2019 година. Така беше надмината целта до 2030 година бројот на овие инфекции да се намали за 15 отсто.
Иако земјите успешно ги користат мерките за контрола на инфекциите за да ја намалат зачестеноста на МРСА, клебсиелата потешко се сузбива, рече Гиске, пренесува Политико.
Тешко е да се намали и бројот на инфекциите предизвикани од ешерихија коли отпорна на лекови. И покрај целта до 2030 година овие инфекции да се намалат за 10 отсто, меѓу 2019 и 2025 година во ЕУ нивниот број се зголеми за 16,4 отсто.
Нееднаков напредок
Клучно е и антибиотиците да се употребуваат помалку и целно, бидејќи избегнувањето на нивната употреба кога не се потребни може да го намали ризикот бактериите да развијат отпорност.
Според новите процени, потрошувачката на антибиотици во ЕУ се намалила за пет отсто меѓу 2019 и 2025 година, што е значително под целта до 2030 година да се намали за 20 отсто.
ЕУ постепено напредува во употребата на посоодветни видови антибиотици. Сè повеќе се приближува до целта најмалку 65 отсто од антибиотиците што се употребуваат во Европа да бидат соодветни според критериумите на Светската здравствена организација. Во 2025 година нивниот удел достигна 62,5 отсто.
„И понатаму заостануваме во исполнувањето на неколку цели на ЕУ за 2030 година во борбата против антимикробната резистенција“, соопшти директорката на ЕЦДЦ, Памела Ренди-Вагнер.
Една од поновите иновации што носат промени е геномскиот надзор, објави Политико. Тој им помага на надлежните органи побрзо да проценат како се шират бактериите отпорни на лекови, рече Ренди-Вагнер.
„Тоа ни овозможува порано да реагираме за да го запреме пренесувањето, поефикасно да ги насочуваме одлуките за лекување и да утврдиме каде новите антибиотици се најпотребни“, додаде таа.




