И покрај пандемијата, во Белорусија се одржа воена парада на која присуствуваа илјадници луѓе.
Претседателот на Белорусија претходно објави дека нема да ја откаже воената парада по повод Денот на победата, и покрај тоа што Москва се откажа од масовната церемонија.
„Морам да кажам дека не можеме да ја откажеме парадата – едноставно не можеме. Размислував за тоа долго време. Се разбира, тоа е емотивна и длабоко идеолошка работа“, рече тогаш Лукашенко.
Илјадници луѓе, меѓу кои и ветерани од Втората светска војна, присуствуваа на воената парада како дел од Денот на победата, и покрај епидемијата на коронавирус.
Русија и другите земји ја откажаа воената парада, така што Белорусија е единствената земја од поранешна СССР која со воена парада ја одбележа 75-годишнината од победата над нацистичка Германија.
„Во овој луд, дезориентиран свет, многумина ќе не осудат за одбележување на овој свет настан овде и сега“, рече белорускиот претседател Александар Лукашенко, додавајќи: „Не брзајте со заклучоци, не не осудувајте нас наследници на белоруските победници. Немавме друг избор. Но, дури и да имавме, ќе постапевме исто“.
Домашните и странските медиуми изразија загриженост за парадата и масовното собирање среде епидемијата на коронавирус.
Претседателот Лукашенко јавно ја втурна епидемијата во позадина уште порано кога се појави на велигденската литургија, но и на некои други јавни настани, и им рече на новинарите дека вирусот не е смртоносен како што се кажува.
