Израел се уште не почна копнена инвазија врз Газа, и покрај тоа што ја најави, а доцнењето медиумите и експертите го припишуваат на меѓународниот притисок, политичко-воените поделби и загриженоста за заложниците.

Осумнаесет дена по најсмртоносниот напад што некогаш бил извршен врз Израел од страна на палестинското исламистичко движење Хамас, кое владее со Газа, израелската војска немилосрдно ја гранатира територијата.

Но, освен некои релативно мали упади, копнената офанзива не е започната.

„Постои криза на доверба меѓу (израелскиот премиер) Бенјамин Нетанјаху и ИДФ (армијата)“, наведува во уреднички коментар дневниот весник Једиот Ахронот.

„Владата има потешкотии да носи одлуки за кои сите се согласуваат за главните прашања“.

Според владини и воени извори, „Нетанјаху е лут на генералите и ги обвинува за она што се случи“ за време на, како што Израелците го нарекуваат „фијаско на 7 октомври“.

На тој ден, земјата остана вчудоневидена откако милитантите на Хамас упаднаа преку границата со Газа инападнаа за кое израелските власти велат дека убиле повеќе од 1.400 луѓе.

Тие, исто така, држат повеќе од 220 заложници во најлошиот напад во историјата на Израел, кој предизвика жестоко израелско бомбардирање на Газа, во кое претставници на Хамас велат дека убиле 5.791 лице.

Едногласноста ги обедини левите и десните крила на мејнстрим израелската политика.

„Споровите околу овие операции создаваат тензии, особено меѓу премиерот Бенјамин Нетанјаху и министерот за одбрана Јоав Галант“, напиша колумнистот Амос Харел во левичарскиот дневен весник Хаарец.

Државното радио забележа „несогласување меѓу премиерот и високите рангови во војската“, со меѓусебни обвинувања дека не го спречиле крвавиот напад од милитантите на Хамас.

Коментаторите велат дека фактот што во официјалните изјави често се споменува приближување на ставовите на највисоко ниво значи спротивното, откривајќи ја вештачката природа на обединет фронт.

„Премиерот, министерот за одбрана и началникот на Генералштабот на ИДФ работат во тесна и целосна соработка, деноноќно, за да ја водат државата Израел до одлучувачка победа над Хамас“, се вели во соопштението на владината прес-служба.

„Постои целосна и взаемна доверба меѓу премиерот, министерот за одбрана и началникот на Генералштабот на ИДФ; единството на целта е јасно“.

Патрик Бетане, специјалист за разузнавање во аналитичкиот центар на Израелскиот Меѓународен институт за борба против тероризмот (ИКТ), го потврди „несогласувањето за копнена офанзива“.

„Но, фактот што има заложници кои се држат во Појасот Газа комплицира се“, рече тој.

„Израел чека да види како може да се реши овој проблем пред да дејствува.

Роднините на заложниците во Газа организираат секојдневни демонстрации пред домот на Галант во Тел Авив.

Акива Елдар, експерт за израелска политика, тврди дека „по емоциите предизвикани од овој страшен масакр, Биби (Нетанјаху) и генералите почнуваат да размислуваат поинаку“. Тој рече дека присуството во Израел на американски воен персонал има за цел да спречи каков било потег што може да значи смрт на заложници, вклучително и Американци.

Ова, рече Елдар, фрла ново светло на ветувањата на Нетанјаху и Галант дека Хамас ќе биде искорен кога војната ќе заврши.

Сепак, началникот на армијата Херзи Халеви во текот на ноќта повтори дека неговата цел е целосно отстранување на Хамас и неговите водачи.

„Добро сме подготвени за копнените операции на југот“, им рече тој на војниците според изјавата објавена од портпаролот на армијата.

Политичкиот аналитичар Даниел Бенсимон нагласува: „Несогласување или не, факт е дека Американците и Европејците доаѓаат во Израел за да го галат со медени зборови со цел да спречат копнена офанзива“.

Францускиот претседател Емануел Макрон во вторникот стана последниот странски лидер што го посети регионот и се сретна со израелскиот премиер Нетанјаху.

„Меѓународната заедница стравува дека копнената операција би предизвикала верижна реакција која би можела да го зафати целиот регион, а можеби и подалеку“, рече Бенсимон.

Израелците беа допрени од изразите на сочувство и солидарност од неколку лидери кои ја посетија земјата во изминатите две недели, вклучувајќи го и американскиот претседател Џо Бајден, кој дојде на 18 октомври.

Макрон им рече на Израелците дека не се сами во „борбата против овие терористички групи“, но предупреди да не се „проширува овој конфликт“.

За Бенсимон „Бајден и Макрон кажуваат убави работи“.

„Но, на крајот тие сакаат да го спречат Израел да влезе во Газа и да го спречат Иран да се вклучи“ преку шиитското движење Хезболах, негов застапник во Либан, вели тој.