ЏАФЕРИ: Прв ден премиер – и најкратката патека е тешка да се изоди ако немаш визија, јас и денес, како секогаш досега, имам јасна цел

Талат Џафери, новиот технички премиер пристигна на првиот работен ден во Владата, каде беше пречекан од премиерот во оставка Димитар Ковачевски.

-Прв ден премиер. И најкратката патека е тешка да се изоди ако немаш визија, план насока и цел. На сите предизвици и патеки до сега сум им пристапувал со добро планирање и јасна цел. Така е и денес, со јасна цел за Европска РС Македонија, напиша Џафери на Фејсбук.

Досегашниот претседател на Владата, Димитар Ковачевски, ја предаде премиерската функција, на новоизбраниот претседател на Владата, Талат Џафери.

Претседателот на Владата Џафери беше пречекан од страна на Ковачевски, по што следеше кратка тет а тет средба и изјави за медиумите.

На средбата досегашниот премиер Ковачевски, му го честиташе стапувањето на премиерската должност на новоизбраниот премиер Џафери и му посака успешен мандат и ефикасна работа, во името на интересите на сите граѓани и на Република Македонија.

Претседателот на Владата Џафери искажа задоволство од досегашната соработка со Владата и истакна дека со особена одговорност ѝ пристапува на функцијата премиер, подготвен за сите предизвици кои ги носи извршната власт.

Двајцата, заеднички ја истакнаа важноста од организација и спроведување мирни, фер и демократски избори и ефикасно спроведување на утврдените владини политики согласно Програмата за работа на преодната Влада, во насока на евроатланските определби на Република Македонија.

Фото: Фејсбук на Талат Џафери