На опозицијата и пречи тоа што ние навистина работиме и добро сработуваме, изјави вечерва Венко Филипче на ТВ Телма.
Оваа негова изјава веднаш беше проследена со бурни реакции на социјалните мрежи, главно потсмешливи, а една од нив, која нималку не е несериозна е и таа на Борис Дамовски, режисер и еден од лидерите на „За заедничка Македонија“, кој кусо напиша:
„И на мртвите им смета, ама од други причини.“ Навистина, на овие збориви на Филпче и не може да се има друга реакција освен таа на Дамовски.
Инаку, Филипче изјави и дека здравствените власти будно ги следат забелешките на другите земји за вакцината на „АстраЗенека“, која државава треба да ја добие преку Ковакс механизмот.
– Внимателно ги следиме забелешките од другите земји. Будно следиме, препораките од самите производители и одлуките во одредени земји. Врз основа на тоа ги градиме нашите препораки, нагласи Филипче при гостување во емисијата Топ Тема на Телма.
Тој додаде дека лично нема проблем да се вакцинира со која било вакцина, бидејќи како што нагласи сите се безбедни.
– Немам проблем да се вакцинирам со која било вакцина. Сите вакцини се безбедни. Лично немам проблем да се вакцинирам и со вакцината на „АстраЗенека“, изјави Филипче.
Тој во гостувањето се осврна и обвинувањата на ВМРО-ДПМНЕ за набавка на кинеските вакцини преку наводни офшор посредници. Филипче посочи дека откако не успеале во иницијалните обиди да стапат во контакт со прозводителот на вакцините во Кина, од кинеските компании кои работат во земјава добиле препорака како да стигнат до производителите.
– И стигнавме до нив, разговаравме и за количините и за времето на транспорт. По известувањето на тамошното Министерство ни беше укажано дека тоа не е патот по кој треба да се оди и ние тоа го испочитувавме. Какви провизии, кога ние сме направиле уплата и таа е вратена, изјави Филипче.
Тој нагласи дека обвинувањата на ВМРО-ДПМНЕ се во континуиетет и дека раководните луѓе од партијата сакаат да ги пресликаат работите што ги правеле кога беа на власта.
– Таков начин како што имаше во времето на ВМРО-ДПМНЕ, сега нема. На опозицијата и пречи тоа што ние навистина работиме и добро сработуваме, додаде Филипче.
Во врска со случајот со директорот на струшката болница Мухамед Асани и родилката од Дебар, Филипче не ја исклучи можноста за негово разрешување.
– Оставам само уште малку време, заради тоа што, заради сите други обврски, не направивме детален увид, но следната недела ќе излеземе со став, изјави Филипче. сп/
