Планината Водно во моментов, на првиот ден од пролетта, и не е баш најзгодно место за сликање на градоначалникот Петре Шилегов, на министерот и заменикот за екологија, затоа што таму се сечат стотоци кубици дрвја. Поубави места за сликање и за ветување нови цвеќиња и дрвца се училишните дворови.
Така денеска, екипи на ЈП „Паркови и зеленило“, на првиот ден на пролетта, симболично засадија 10 декоративни садници од видовите туја розенталис и ацер и 1.200 цвеќиња од видот виола – темјанушка во дворот на ОУ „Мирче Ацев“, во општината Ѓорче Петров, каде присуствуваа градоначалникот Петре Шилегов, градоначалникот на Ѓорче Петров Александар Наумовски, директорот на ЈП „Паркови и зеленило“ Ардијан Муча и ученици од ова основно училиште.
– Во тек е редовното пролетно уредување на јавните зелени површини во градот. Оваа пролет е предвидено да се засадат повеќе од 1.200 повеќегодишни висококвалитетни листопадни и зимзелени садници во сите скопски општини. Работиме и на обновување на средишното булеварско зеленило. Градот од оваа пролет ќе биде побогат и за неколку нови паркови чие оформување е во тек, рече Шилегов.
Деновиве се работи на уредување на новиот парк Ибни Пајко зад зградата на Филхармонијата, на обнова на зелените површини во Центар и во Карпош на булеварот Партизански одреди, на парковите на булеварот Февруарски поход и булеварот Србија во Аеродром, на булеварот Борис Трајковски во Кисела Вода, на улицата Втора македонска бригада во Чаир, како и на паркот во близина на студентскиот дом „Кузман Јосифовски Питу“, соопшти прес-службата на Град Скопје.
Градоначалникот додаде дека зазеленувањето останува на врвот на приоритетите на Град Скопје и дека со враќањето на зеленилото во градот се подобрува животната средина и квалитетот на воздухот.
А додека во Скопје ќе се засадат 1.200 дрвца, погоре на Водно, се сечат стотици кубици брези и други долгогодишни дрвја. Но, таму каде што се масакрира шумата, не е баш добро место за сликање ни за градоначалникот Шилегов, ниту пак за министрите од ресорот екологија.
