Градоначалникот на Скопје, Орце Ѓорѓиевски денеска упати честитка по повод 23 Октомври – Денот на Македонската револуционерна борба.

Ѓорѓиевски рече дека ова е ден кога со гордост се поклонуваме пред храброста на оние што својот живот го посветиле на Македонија.

„Постојат идеали што времето не може да ги избрише. Постојат завети што генерациите ги носат како најсвета должност. Таков е идеалот за слободна, самостојна и достоинствена македонска држава. Таков е аманетот на македонските револуционери! ВМРО е темел вграден во македонската борба за државност. ВМРО е непокор и пркос, решителност да се истрае и тогаш кога цената на слободата е сопствениот живот. Во неговото историско име живее стремежот на генерации Македонци, да бидат свои на своето“, истакна тој.

Денес, како што посочи градоначалникот, нашата должност е тој аманет да го продолжиме со дела.

„Да ја чуваме татковината, да го негуваме македонскиот јазик, да ги браниме достоинството и слободата и да создаваме држава во која нашите деца ќе ја гледаат својата иднина. Пред жртвата на јунаците се поклонуваме. Пред одговорноста за Македонија стоиме исправено! Нека биде вечен споменот за нивната борба и нека биде неугаслив пламенот на нивните идеали!“, порача Ѓорѓиевски.