Италијанскиот министер за одбрана го обвини генералниот секретар на НАТО Јенс Столтенберг за предавство на Рим затоа што не именувал Италијанец како нов претставник на организацијата за координација на дејствувањето на јужните граници на воениот пакт. Позицијата беше формирана претходно овој месец на барање на италијанската премиерка Џорџа Мелони, а нејзината влада тогаш порача дека смета дека треба да ја добие Италијанец.
НАТО сè уште нема објавено кој ќе биде именуван, но италијанскиот министер за одбрана Гвидо Кросето за весникот Ла стампа на крајот на минатата недела кажа дека Столтенберг номинирал Шпанец, додавајќи дека таа одлука ја смета за „речиси лична навреда“.
Канцеларијата на Северноатлантската алијанса на прашањето за критиките на Кросето одговори дека „НАТО во право време ќе објави одлука за какво било именување“ и одби да ја коментира изјавата на италијанскиот министер. Кросето кажа дека му напишал „многу лута порака“ на Столтенберг.
„Нè разгневи и ќе има последици на лично ниво“, кажа Кросето, што претставува непримерно постапување на една членка на НАТО кон шефот на организацијата. „Тој го згази принципот. Италија е таа која се бореше за создавање на улогата претставник за јужното крило“, изјави Кросето, додавајќи дека Столтенберг не се сложил со одлуката за формирање на новата функција и затоа ја казнил Италија.
НАТО минатиот месец го избра поранешниот холандски премиер Марк Руте од 1 октомври да ја преземе позицијата од Норвежанецот Столтенберг, кој заминува по десет години.
На новинарското прашање дали очекува таа позиција да ѝ биде доделена на Италија по заминувањето на Столтенберг, Кросето кажа дека се надева дека ќе ѝ биде доделена „на најдобрата личност“.
