Според календарот на МПЦ (Јулијанскиот календар) денеска е 13 февруари.
Денеска е Преподобен Мартинијан.
Мартинијан бил родум од Палестинска Кесарија (Цезареја). На 18-годишна возраст го оставил светот и се повлекол на една планина во Кападокија, каде се подвизувал цели 25 години. После тоа тргнал да ги обиколува населените места, проповедајќи го Христа и поучувајќи го народот, но без да се задржува долго во нив. За две години тој обиколил 164 места, а најпосле стигнал во Атина, каде што се упокоил во 422 година.
ОД КАТОЛИЧКИОТ КАЛЕНДАР: Денеска е Св. Порфириј.
Бил роден во 347 година во Солун, во многу богато семејство. Околу 378 година се повлекол во пустината, во Египет и живеел монашки живот. Порфириј бил многу побожен и имал способност за објаснување на Светото писмо. Ги сакал сиромашните. Во 395 година бил назначен за бискуп на Газа во Палестина. Неговите проповедувања и светиот живот придонеле неверниците да станат христијани. По 20-годишно бискупување, умрел во 420 година.
