Вклучен аларм ги одложи претпладневните рочишта во Кривичниот суд – Скопје, меѓу кои и за „27 април“ и за „Монструм“.
Поради неможност да се исклучи алармот, прекинато е снабдувањето со струја во судот.
Вработените, обвинети и нивните бранители, како и новинарските екипи кои се дојдени да ги следат рочиштата, се пред судската зграда.
Засега нема информација од што се вклучил алармот. На влезовите во Кривичниот суд се залепени известувања дека поради технички проблеми судењата се одложени по 11 часот.
Нејасно е како е можно да не се исклучи електричното напојување на алармот, поради што мора да се исклучува струјата во целиот објект. Веројатно ќе има објаснување подоцна каков е „овој аларм“!?
Можеби е само коинциденција, но денеска работната група за помирување на Интерпартиската парламентарна група за помирување, реформи и интеграција во Собранието на Република Македонија, ќе го одржи вториот работен состанок на кој се очекува да биде презентиран предлог законско решение за помирување за дел од учесниците во настаните во законодавбиот дом од 27 април минатата година.
Премиерот Зоран Заев кој учествуваше на вториот состанок на Телото за помирување рече дека постои политичка волја да се спроведе процесот, но нагласи црвените линии не смеат да се преминуваат.
– Сите може да се согласиме дека терористичко загрозување на уставниот поредок не е нешто кое треба да ги опфати сите. Имаме потреба да направиме јасна дистинкција и разграничување. Секако пораката на помирување и подадена рака мора да постои, но и поарака на неповторување на вакви работи исто така мора да постои, рече Заев.
Емилија Александрова од независната пратеничка група на ВМРО-ДПМНЕ и Коалицијата истакна дека трите процеси на интеграција, реформи и помирување одат заедно, а особено значаен е процесот на помирување кој треба да ја подобри општата атмосфера во државата.
– Ние сме транспарентни и се надеваме дека ќе охрабриме и други паретници да се вклучат во овие процеси, рече Александрова.
Координативното тело за помирување брои 15 члена од владејачкото мнозинство, од независната пратеничка група на ВМРО-ДПМНЕ и пратеници кои немаат пратенички групи. Во телото не учествуваат претставници на Беса, ВМРО-ДПМНЕ и Алијансата за Албанците.
