Лидерката на Францускиот национален собир (РН), Марин Ле Пен, денеска ги презентираше главните елементи на буџетската програма за претседателските избори во 2027 година, ветувајќи дека Франција ќе постигне нето заштеди од 140 милијарди евра до 2032 година во споредба со 2026 година и дека јавниот дефицит ќе се намали под три проценти од БДП во рок од 18 месеци.
Ле Пен изјави дека планот треба да овозможи воспоставување примарен буџетски суфицит во рок од 18 месеци, додека РН предвидува намалување на јавните расходи за 125 милијарди евра до 2030 година, пренесува Фигаро.
Во својот предлог буџет, РН предвидува дека јавните нето расходи ќе се намалат за 64 милијарди евра, а даноците за вкупно 27 милијарди евра.
Меѓу најголемите заштеди се 20 милијарди евра за системот за социјална заштита, 12 милијарди за имиграција и девет милијарди евра за францускиот придонес во буџетот на Европската Унија.
Во исто време, се предвидуваат околу 16 милијарди евра нови расходи, меѓу другото, за зголемување на надоместоците за лицата што се грижат за членовите на семејството, целосно покривање на одредени стоматолошки трошоци и изградба на нови затворски објекти.
РН, исто така, предлага укинување на повеќе од 120 даноци, вклучувајќи одредени даноци на производство, намалување на ДДВ за енергија и воведување нулта стапка на ДДВ за 100 основни производи.
За лицата под 30 години, се обезбедува ослободување од данок на доход до ниво од четири просечни минимални плати.
Ле Пен, исто така, објави уставно „златно правило“ кое би го ограничило идното задолжување на државата, со долгорочна цел намалување на јавниот долг на 60 проценти од БДП.
Според планот на РН, поголемиот дел од заштедите треба да се постигнат со намалување на државните трошоци и рационализација на јавната администрација, вклучително и укинување на одредени агенции и јавни институции.
Партијата, исто така, предлага намалување на субвенциите за медиумите и јавните аудиовизуелни услуги, со можност за нивна приватизација.
Ле Пен оцени дека Франција се соочува со сериозен проблем со јавниот долг и предупреди на зголемување на трошоците за сервисирање поради повисоките каматни стапки.
Според нејзините тврдења, токму растот на каматните стапки претставува зголемен товар за јавните финансии, но и за трошоците за кредити за домаќинствата и бизнисите.
Програмата предвидува и мерки за зголемување на куповната моќ, меѓу кои се бесплатните возачки испити за млади лица без криминално досие и укинување на студентскиот придонес во CVEC, како и мерки во областа на здравството и поддршката на семејството.
