Германската канцеларка Ангела Меркел изјави дека прашањето за справување со миграцијата кон и во рамките на Европската унија може да го одреди опстанокот на ЕУ.
Во говор пред пратениците во Бундестагот, Меркел рече дека „ЕУ се надева оти ќе им понуди на своите граѓани единствен став за миграцијата, кој ќе биде надежен и реалистичен во правен план“.
– Треба да се воспостави режим за секој вид миграција, така што луѓето ќе знаат дека законот и редот се почитуваат, рече Меркел.
Таа истакна дека Германија ќе ги исполни своите обврски за зголемување на трошоците за одбрана и ќе остане сигурен партнер на НАТО.
Германската канцеларка, исто така, обрна внимание и на заканите на САД за воведување царински давачки за увоз на странски автомобили и предупреди дека постои ризик од трговска војна ако САД ја остварат оваа закана.
Германското Министерство за внатрешни работи денеска соопшти дека веќе подготвува нацрт договори со други членки на Европската унија за враќање на мигранти кои побарале азил во Германија, а претходно побарале азил во некоја друга земја.
Портпарол на Министерството најави дека министерот Хорст Зехофер денеска ќе ја посети Австрија, каде со канцеларот Себастијан Курц ќе разговара за новиот германски план за справување со мигрантите. Планот постигнат меѓу Зехофер и канцеларката Меркел предвидува отворање на кампови во германската сојузна држава Баварија, која е политичка база на Зехофер, и проверка на сите нови барања за азил во овие кампови, при што мигрантите кои веќе побарале азил во друга членка на ЕУ би требало да бидат вратени таму.
Меркел пак треба да се сретне со унгарскиот премиер Виктор Орбан, кој беше предводник на повиците за затворање на границите на Европската унија за неконтролираниот влез на мигранти, и кој е политички сојузник на Курц и Зехофер.
