Романија периодично ги анализира своите способности за брзо идентификување и соборување беспилотни летала, вели романскиот министер за одбрана Романија периодично ги анализира своите способности за брзо идентификување и соборување беспилотни летала што пристигнуваат на територијата на земјата, изјави министерот за одбрана Раду Мируца во интервју за телевизијата Диџи 24.
Воената одлука за соборување на беспилотно летало означено како „непријателско“ е итна, рече Мируца, истакнувајќи дека се очекува промена во тактиката на Русија во користењето беспилотни летала и Романија ќе мора да се прилагоди.
„Гледам дека беспилотни летала означени како „Произведено во Русија“ влегуваат во Романија без дозвола и со кршење на меѓународното право, со оглед на тоа што Романија не е во војна. Постои исклучително прецизно правило според кое земјата од која е испратен таков беспилотен авион е одговорна за него, каде и да оди. (…) Ако влезат 150 беспилотни летала, повеќе нема да бидеме во мирно време. Тогаш реакцијата на романската армија ќе биде поинаква. Одлуката за соборување на беспилотното летало се донесува веднаш – во моментот кога е утврдено дека е непријателско“, рече министерот за одбрана.
Со оглед на фактот дека Романија не е во војна, тој ја поддржа потребата од упатување категоричен дипломатски протест.
„Романија не е страна во војната и не објавила војна на Руската Федерација. Зошто овие беспилотни летала се испраќаат во земја каде што ситуацијата е фундаментално различна од онаа во Украина?“, изјави Мируца, додавајќи дека некои од овие беспилотни летала се соборени од воздушната одбрана во Украина, други отстапуваат од својот курс, а трети „само малку влегуваат во воздушниот простор“ (во Романија).
Бугарскиот премиер Румен Радев вчера соопшти дека беспилотно летало влегло на територијата на Бугарија. Според информациите, дронот дошол од романска територија, достигнал растојание од 100 метри од границата и експлодирал без да предизвика штета. Нема повредени луѓе.
Романското Министерство за одбрана соопшти дека радарскиот надзор на министерството не открил ниту едно летало што го преминало романскиот воздушен простор во насока кон Бугарија.
