Нетфликс го купи „InterPositive“, стартап од областа на вештачка интелигенција основан во 2022 година од актерот и режисер Бен Афлек, во договор вреден дури 587 милиони долари.
Според „Блумберг“, конечната вредност на аквизицијата би можела да достигне 600 милиони долари, доколку се исполнат однапред дефинираните деловни цели, што го прави овој договор една од најголемите инвестиции во вештачка интелигенција во филмската индустрија.
„ИнтерПозитив“ не е наменет како уште една алатка што пишува сценарија или генерира видео содржина врз основа на текстуални команди. Напротив, Афлек од самиот почеток инсистира дека идејата е сосема поинаква – дека вештачката интелигенција треба да биде помош за филмските работници, а не нивна замена.
„Прво мора да го снимите вашиот филм, а дури потоа, со помош на вештачка интелигенција, градите модел врз основа на тој материјал“, објасни Афлек во видео објавено од Нетфликс оваа пролет“.
Продажбата на InterPositive покажува дека битката за технологијата со вештачка интелигенција во Холивуд сè повеќе се движи зад сцената. Наместо да ги заменуваат сценаристите или актерите, сè повеќе се развиваат нови алатки за поддршка на монтажерите, кинематографите и визуелните уметници, кои би можеле да ги користат за да ги забрзаат и поедностават сложените процеси на постпродукција.
