Дозволете ми најпрвин да се заблагодарам на поддршката која што ни ја давате изминативе денови. Истата таа не мотивира да истраеме во нашата борба против погрешните политики на владата предводена од Зоран Заев, рече во своето обраќање во живо на својата Фејсбук страна претседателот на ВМРО-ДПМНЕ, Христијан Мицкоски.
Ова се историски моменти. Ова се моменти кога се одлучува и за иднината на македонскиот народ, македонската нација и македонската држава. Ова се моменти кога се потврдува тезата дека договори потпишани набрзина, не само што не се
решение туку напротив самите по себе претставуваат проблем за иднината на Македонија во рамките на ЕУ. Тоа за жал не успеа да го види Зоран Заев и денеска наместо решение истото тоа претставува проблем. Само политички аматер може да потпише договор во кој што критериум за напредокот на Македонија и нејзината интеграција во рамките на ЕУ ќе бидат лингвистичките проблеми и проблемите со историјата. Само политички аматер може во една таква подредена состојба да ја донесе сопствената држава, сопствениот народ и сопствената нација. Затоа ве повикувам масовно без разлика на политичката припадност, без разлика на верската и етничката припадност утре, во текот на утрешниот ден почнувајќи од 12:30 завршувајќи во 14 часот да се приклучиме на протестите кои што се натпартиски, обединувачки и гласно да зборуваме. Гласно да зборуваме против овие погрешни политики на Владата на СДСМ предводена од Зоран Заев. Ја користам оваа прилика, истовремено, да се извинам на моите сограѓани скопјани за можеби сообраќајниот метеж што ќе се случува во текот на утрешниот ден. Ве молам имајте разбирање за сето ова кое што денеска го правиме затоа што ако денеска не успееме се плашам дали некои идни генерации ќе имаат можност да ја поправат грешката што денеска ќе ја направат Зоран Заев и СДСМ. А до политичарите, сакам една порака да упатам. Немојте да се осмелите да го чепкате македонскиот идентитет, македонскиот јазик, посебност, македонската историја, традиција, обичаи. Немојте да се осмелите и да помислите и да се откажете од македонското малцинство кај нашиот источен сосед затоа што таа хартија која што вие ќе ја потпишете е безвредна. Следната влада која што ќе биде влада на единство, истото тоа парче хартија нема намера да го почитува, истакна Мицкоски.
Затоа почитувани сограѓани утрешниот ден е денот кога треба да сме масовни и гласно да зборуваме. Ве повикувам, уште еднаш, сосема на крај да ни се придружите заедно да победиме во спасот на македонската иднина и иднината на македонскиот народ, додаде тој.
