Резолуцијата на Советот за безбедност на ОН предложена од САД повикува на „хуманитарна пауза“ наместо прекин на огнот за да се овозможи очајно потребната помош да стигне до Газа.
Резолуцијата, исто така, „го потврдува вроденото право на сите држави на индивидуална и колективна самоодбрана, а исто така потврдува дека како одговор на терористичките напади, земјите-членки мора целосно да ги почитуваат сите нивни обврски според меѓународното право, особено меѓународното право за човекови права, меѓународното право за бегалците и меѓународното хуманитарно право“, се вели во копија до која дојде Си-Ен-Ен.
Резолуцијата ја поздравува досегашната испорака на помош во Газа и ги охрабрува земјите-членки да ги поддржат другите напори за испорака на помош.
Резолуцијата го осудува нападот во Израел на 7 октомври и земањето заложници од страна на Хамас и ги повикува „сите страни целосно да ги почитуваат своите обврски според меѓународното право“.
Нејасно е дали резолуцијата ќе помине или ќе биде ставено вето од некој од постојаните членови на советот.
САД ставија вето на резолуцијата предложена од Бразил, која исто така повика на „хуманитарна пауза“ за да се овозможи испорака на помош до опколената Газа. Таа резолуција ги осудува нападите на Хамас врз Израел и повика на ослободување на заложниците. Исто така, ги повика сите страни да го почитуваат меѓународното право и да ги заштитат животите на цивилите во Газа поради жестоката израелска одмазда.
Во објаснувањето на одлуката за вето, американската амбасадорка Линда Томас-Гринфилд рече дека САД се „разочарани од оваа резолуција во која не се споменува правото на Израел на самоодбрана“.
Американските власти јавно ја отфрлија идејата за прекин на огнот и понудија поддршка за, како што го нарекоа „императивот“ на Израел да се брани по бруталните напади на Хамас претходно овој месец.
