Политиките на СДСМ кои се насочени кон градење на праведно општество и еднакви можности за сите граѓани даваат реални резултати, соопшти денеска владејачката партија за решавањето на проблемот на големата армија стечајци кои се произведени со криминалната приватизација која беше спроведена во Македонија токму од оваа партија.
– СДСМ ја исправи долгогодишната неправда кон лицата кои останаа без приходи и го реши статусот на стечајните работници. Благодарение токму на политиките на СДСМ тие денес не се повеќе маргинилизирана група на граѓани, туку активни учесници во општеството. Собранието ги изгласа измените и дополнувањата на Законот за стечајни работници, со што бројот на стечајци кои ќе земаат месечен надоместок од околу 8.000 денари до пензионирање се зголемува за уште 1000 лица.Со тоа вкупниот број на стечајни работници кои се материјално обезбедени изнесува 12.000 лица. Стечајните работници кои се опфатени со најновите измени на Законот за стечајци, од петок ќе можат да поднесуваат барања во Центрите за вработување со цел остварување на правото на користење на месечен надомест. Наспроти негрижата на претходната власт која за 11 години владеење успеа да реши само 4.000 стечајни работници, СДСМ за 2.5 години материјално обезбеди 12.000 стечајци. Ова е уште една потврда дека за СДСМ сите граѓани се важни. Затоа, на престојните избори на 12 април ќе победат политиките на СДСМ кои значат вистинска грижа кон сите граѓани, се вели во соопштението на СДСМ.
За потсетување на историјатот на овој проблем треба да се навратиме на почетоците на самостојна Македонија, кога токму СДСМ беше на власт и ја спроведе приватизацијата на економијата во Македонија кога според некои проценки 250.000 работници станаа стечајци.
