МВР утврди дека возилото со „флешери“ не било ауди туку „мерцедес“, рече денеска министерот за внатрешни работи Оливер Спасовски, а пријавата дека брзо возело била упатена од граѓанин.
– Се утврди дека патничко возило „мерцедес“ кое не е во државна сопственост или на некое министерство, туку на приватна фирма, а возилото било упатено според нашите сознанија кон приватна болница, рече денеска Спасовски одговарајќи на новинарско прашање поврзано со инцидент и нелегална употреба на флешери од синот на неговиот заменик-министер во МВР, Назим Буши.
Спасовски по посетата на СВР Скопје нагласи дека е убеден оти не е синот на неговиот заменик и додаде дека имало многу шпекулации за овој случај.
– Беа изнесени многу податоци дека тоа возило е „ауди“, дека е на СОЗР, дека е возило на МВР, затоа се вклучи и делот на внатрешна контрола итн. Се утврди прво дека пријавата доаѓа од граѓанин која што била упатена до нашиот Центар за известување на МВР за возило кое што се движи со поголема брзина. Се утврди патничко моторно возило било „мерцедес“ кое што не е сопственост на СОЗР, не е сопственост на МВР и не е сопственост на кој било државен орган, туку е сопственост на приватно правно лице кое се движело во тој период и според наши сознанија се упатило некаде во болницата Систина, рече Спасовски.
Тој посочи оти МВР ги обезбедило сите снимки и нагласи дека одговорност ќе има за се тоа што ќе се утврди во зависност од снимките.
– Ќе се детектира прекршок, така што во тој дел нема отстапки за кој и да се однесува. Меѓутоа, и шпекулација беше во тој момент дека е тоа не знам син на функционер, дека не знам тоа возило учествувало и во други кривични дела итн. Затоа реков, сите сознанија што ги имате и во овој дел дали вие или граѓаните не е важно, ако ги имаме такви сознанија, бидејќи се тврдеше со прилично голема сигурност, треба да се дадат на ЈО и тука нема функционер бил, не бил функционер. Секој ќе си одговара за тоа што си го има направено. Не зборувам само за овој настан како прекршок, туку и за кривично дело, рече Спасовски.
Тој што пријавил, како што рече, не кажал кој вози, ниту има какво било сознание.
– Денеска го утврдуваат колегите тоа да видиме кој возел, бидејќи мораме да утврдиме, тој што пријавува не кажува кој вози, ниту има какво било сознание, го утврдуваме преку некои други механизми, штом ќе излезат колегите со детална информација ќе испратиме соопштение и ќе ги знаеме тие детали, рече Спасовски.
