Претседателот на каталонската Влада, Ким Тора, изјави дека осудителната пресуда за каталонските политичари, на кои им се суди за организирање на референдумот за независност на Каталонија, може дополнително да ја засили желбата за отцепување од Шпанија.
Пресудата на Врховниот суд на Шпанија наскоро треба да биде објавена, најверојатно уште во октомври, пренесе Хина.
Обвинетите се соочуваат со казни од седум до 25 години затвор откако беа обвинети за бунт против Шпанија, непослушност и користење јавни пари за организирање на референдумот, што беше забранет од шпанскиот Уставен суд.
Тора, исто така, порача дека одбива да прифати осудителни пресуди, напоменувајќи дека обвинетите немаа праведно судење.
-Доколку ги осудат нашите колеги, задолжително ќе делуваме, рече Тора и истакна дека регионалната Влада ќе одговори со програма чија цел повторно ќе биде независноста, која ќе биде во центарот на политичката акција.
