Американскиот весник Њујорк тајмс поднесе тужба против Европската комисија бидејќи извршното тело на ЕУ одбива да ги објави СМС пораките меѓу претседателката Урсула фон дер Лајен и извршниот директор на Фајзер Алберт Бурле, компанијата што ја произведува вакцината против Ковид-19.
Како што пренесува европскиот портал „Политико“, повикувајќи се на судски документи, „Њујорк тајмс“ смета дека Фон дер Лајен лично преговарала за купување вакцини од страна на ЕУ.
Во екот на пандемијата, кога целиот свет бараше вакцини против Ковид-19, претседателката на Европската комисија, наводно, преговарала договор вреден милијарда долари со претседателот и извршен директор на Фајзер, Алберт Бурле, преку СМС порака.
Комисијата смета дека личните пораки меѓу Фон дер Лајен и Бурле не спаѓаат во обврската за транспарентност и тврди дека не може да ги најде.
Европскиот омбудсман и Европскиот суд на ревизори претходно ја осудија тајноста на Комисијата во овој случај, а за транспарентност е и Европскиот парламент. Тужбата на Њујорк Тајмс е поднесена до Европскиот суд на правдата на 25 јануари.
