Американскиот весник Вашингтон тајмс објави напис со тешки обвинувања против албанската влада.
Според весникот реформските процеси во земјата кои се спонзорирани од фондацијата Сорос ја оставиле Албанија без судски систем, што „е во полза на премиерот Еди Рама“.
– Процесот на проверка на потеклото на имотот и поврзаноста со криминални структури на судиите и обвинителите, наречен ветинг, ги брише политичките противници на Рама, со што му дава апсолутна моќ и оти зад сето ова стои милијардер Џорџ Сорос,пишува весникот.
Се наведува дека корумпираните судии се оставаат на функција додека чесните се отпуштаат од работа, доколку тие „веруваат во погрешна работа или поддржуваат погрешна партија“.
– Во последниве години, Албанија се претвори во нарко-држава, застанувајќи на врвот на листата производители на марихуана што се шверцува во Италија и други делови од Европа. Исто така Албанија стана главна точка за шверц и порта кон Европа за тешки дроги кои доаѓаат од Јужна Америка и Централна Азија, пишува весникот.
Актуелната влада во Тирана се критикува и поради донесените закони кои поради нефункционирање на Уставниот суд не може да се преиспита нивата уставност, а сето тоа помага „во перењето пари од недозволената трговија со дрога“.
Весникот го критикува и американскиот амбасадор во заминување, Доналд Лу, за кого наведува дека иако мандатот му завршил и во амбасадата е назначен времен вршител на должноста тој се уште е во Тирана. За него пишува дека е подржувач на „корумпираната влада на Рама“.
По написот во Вашингтон тајмс околу Законот за проверка на потеклото на имотот на судиите и обвинителите и нивната поврзаност со криминалот, наречен ветинг, реагираше премиерот Еди Рама преку Твитер.
Тој обвини дека написот е подготвен по нарачка на албанската опозиција.
– Плаќајте, плаќајте написи низ светот против реформите во судството! Пцујте ја и проколнувајте ја реформата во правосудството на колку јазици што можете! Обвинувајте не колку што сакате за неморалност од вашата јавна куќа! Ние ќе го исчистиме до корен правосудството бидејќи не се плашиме од вистинската правда, напиша Рама.
Експресно исто така на Твитер, му реплицираше лидерот на најголемата опозициска сила, Демократската партија, Љуљзим Баша, кој обвини дека со пари од дрогата Рама ги „купил правосудството и амбасадорите“
– Ги купи судиите, обвинителите, весниците, телевизиите и амбасадорите, со пари од дрога и корупција и сега не му излегуваат пресметките на Рама. Правдата ја фати, но народот не можеш да го фатиш. Набрзо ќе поднесеш сметка за тоа, напиша Баша.
