Преговорите за членство во ЕУ не почнуваат, а Заев прифати бришење на името Република Македонија, што е доказ дека обезличувањето на сопствената држава и народ не може да биде покритие за неспособноста, расипништвото и криминалот на власта, соопшти денеска ВМРО-ДПМНЕ.
– Заев ја распродава државата на надворешен план и ја уништува дома. Економијата е на дно. Повеќе од една година растот на БДП е нула, платите паѓаат, а цените на производите на мало растат. Стандардот на граѓаните е се понизок. Заев спроведува економски геноцид. Граѓаните живеат се посиромашно, а фирмите на Заеви и Анѓушев влегуваат во милионските бизниси со наркотици, купуваат индустриски гиганти по цена од една гарсониера и добиваат милионски тендери од државата. Фирмите кои донирале на СДСМ наплаќаат милиони евра од граѓаните. Градежништвото повеќе од една година оди во надолна линија, реагира најголемата опозициска партија.
ВМРО-ДПМНЕ потсетува дека падот на нискоградбата е 37 проценти, а инфраструктурни проекти почнати во време на претходната власт неосновано се запрени.
– Земјоделието е на колена. Земјоделците се понижени. Откуп нема. Родот на земјоделците наместо на пазар завршува на буниште. Од ураганот СДСМ пострадаа оризопроизводителите, производителите на зелка, краставица, домати, а сега и на лубеница. Правната држава е деградирана. Правосудните органи не одлучуваат по закон, туку по диктат.Неспособноста на власта е констатирана и од ЕУ. Унијата јасно порача дека без суштински реформи државата нема да добие почеток на преговори. Заев и Димитров ја лажат и ја манипулираат јавноста. Заев и Димитров трајно ја нарушија позицијата на Република Македонија и ги понижија граѓаните, се вели во соопштението.
На крајот се додава дека „Заев потроши повеќе од една година од животот на граѓаните на Република Македонија, а за жал не направи ништо и мора час поскоро да си замине, за на Македонија да и тргне напред“.
