ВРЕМЕ: Дождлив денешниот ден со температура до 14 степени, a од утре стабилно, со ладни утра, сонце и потопло преку денот

Времето во Македонија денеска ќе биде претежно облачно и посвежо со повремени врнежи од дожд, а на повисоките планини од снег.

Ќе дува умерен, долж Повардарието засилен ветер од северен правец. Кон крајот на денот врнежите ќе престанат, а облачноста ќе се намали. Минималната температура ќе биде во интервал од 2 до 9, а максималната од 8 до 14 степени.

Во Скопје ќе биде претежно облачно и посвежо со повремени врнежи од дожд. Ќе дува слаб до умерен ветер од северен правец. Минималната температура ќе се спушти до 6, а максималната ќе достигне 12 степени.

Според УХМР, од среда следува период на стабилно време со ниски утрински температури, кои наместа ќе се спуштат под нула, а дневните ќе бидат во постепен пораст.