Израелската војска соопшти дека денеска ја продолжи борбата против Хамас во Газа, откако ја обвини палестинската милитантна група дека го прекршила седумдневното привремено примирје со пукање врз израелска територија.
-Сирени за предупредување за ракети се слушнаа утрово во израелските заедници во близина на границата со Газа. Ова е првпат да се огласат сирени од почетокот на прекинот на огнот на 24 ноември, јавуваат израелските медиуми.
Во меѓувреме, израелската војска потврди дека нејзиниот одбранбен систем „Железна купола“ пресретнал ракета истрелана од Газа рано утрово. Засега нема коментар од Хамас.
Четврто лице го загуби животот по вчерашното пукање во Ерусалим, според извештаи на израелските медиуми. Четвртата жртва е „вооружен цивил“ кој се обиде да ги фати двајцата напаѓачи, но израелските сили по грешка го сметале за непријател и тешко го раниле. Тој доцна синоќа починал од здобиените повреди. Двајца од напаѓачите, Мурад Мухамед Нимр и Ибрахим Мухамед Нимр, исто така беа убиени кога израелските сили одговорија на нападот.
Премиерот на Израел, Бенјамин Нетанјаху нареди уривање на нивните куќи во источен Ерусалим како казна и одвраќање од идни такви акции.
Министерството за здравство во Газа предводено од Хамас соопшти дека 21 лицe се убиени во првите неколку часа од истекот на примирјето меѓу Израел и Хамас и обновувањето на борбите.
Во неколку бомбардирања низ палестинската територија по 7:00 часот по локално време (05:00 часот по Гринич), портпаролот на министерството Ашраф ал Кудра соопшти дека се убиени 21 лице, од кои две лица во Беит Лахиа, северниот дел на Појасот Газа, потоа седум лица во Магази во централниот дел на Појасот, едно лице појас Газа во градот Кан Јунис, јужен дел на Појасот Газа, двајца во градот Хамад, јужно од Кан Јунис и деветмина во Рафа, јужен дел на Појасот Газа.
фото: МИА архива
