Министерот за внатрешни работи Панче Тошковски денеска оствари средба со Џек Џозеф, раководител на британските работни групи за миграција за Балканот и Африка и со вршителот на должноста амбасадор на Обединетото Кралство, Даниел Фиелер.
-На средбата ја потврдивме заедничката определба за натамошно продлабочување на соработката меѓу Македонија и Обединетото Кралство во областа на граничната безбедност, справувањето со организираниот криминал и јакнењето на регионалната полициска соработка. Посебен акцент ставивме на активностите во рамки на Заедничката работна група за миграција, преку која со координирани активности работиме на откривање и сузбивање на организираниот криминал поврзан со нелегалната миграција во регионот, објави Тошковски на својата Фејсбук страна.
Министерот истакна дека продолжуваат да градат силни партнерства со меѓународните партнери, затоа што заедничкото и координирано дејствување значи побезбедни граници и поголема безбедност за сите граѓани.
