Основното јавно обвинителство Скопје донесе Наредба за спроведување истражна постапка против едно лице на возраст од 19 години за кое постои сомнение дека сторило кривичнo делo – Насилство од член 386 став 6 во врска со став 3 и став 1 од Кривичниот законик.

-Осомничениот и неговиот малолетен брат кој е под законската граница за кривична одговорност преземале дејствија на насилство со кои на едно дете и на едно полнолетно лице им биле нанесени тешки телесни повреди со убоди од нож, а полесно било повредено уште едно дете. Во јавноста и кај присутните лица предизвикувале чувство на несигурност, загрозување, страв и вознемиреност, информира Обвинителството.

Јавниот обвинител до судијата на претходна постапка достави предлог за определување мерка притвор за осомничениот полнолетник.

Министерот за здравство Сашо Клековски денеска информираше дека 13 годишникот кој е тешко повреден се наоѓа во критична состојба. Имал убодна рана во срцето, по што му била извршена операција.

Во врска со настанот, министерот за внатрешни работи Панче Тошковски изјави дека сите лица кои биле вклучени се обезбедени од страна на полицијата.