Дваесет и една претставка за дискриминација на бремени жени во работните односи се поднесени до Комисијата за спречување и заштита од дискриминација (КСЗД), а работата и работните односи остануваат област со најголем број пријави. На денешниот брифинг Комисијата го презентира и новиот Е-ресурсен центар за еднаквост и недискриминација, како и прелиминарните резултати од истражувањето за сексуално вознемирување во образованието, според кои најчесто се регистрирани вербални форми на вознемирување, а жените и техничкиот и административниот кадар се најизложени.

Заменик-претседателот на КСЗД, Зекир Абдула, информира дека во рамките на проектот е воспоставен Е-ресурсен центар, кој ќе биде достапен за институциите, граѓанските организации, медиумите, истражувачите и граѓаните.

Платформата на едно место ги обединува правните стандарди за еднаквост и недискриминација, релевантна судска и управна практика, истражувања, анализи, публикации и стручни ресурси од областа на заштитата од дискриминација.

Центарот е замислен како динамична база на податоци, која постојано ќе се надградува со нови материјали и информации, со цел да придонесе кон подобра информираност, поквалитетни истражувања и креирање политики засновани врз докази.

Абдула посочи дека преку онлајн-алатката ќе може да се внесуваат податоци и информации што ќе бидат корисни за унапредување на системот за заштита од дискриминација и ќе им бидат достапни на сите заинтересирани корисници.

Најголем дел од брифингот беше посветен на заштитата на бремените жени во работните односи, тема за која КСЗД неодамна донесе и општа препорака за заштита од дискриминација на жените поради бременост, раѓање и мајчинство во работните односи.

Од Комисијата посочуваат дека препораката е упатена до работодавачите од јавниот и приватниот сектор со цел доследна примена на законската заштита и спречување нееднаков или понеповолен третман на жените за време на бременост, раѓање и мајчинство. Препораката произлегува од предмети во кои КСЗД утврдила директна интерсекциска дискриминација врз основа на пол и род поврзана со бременост, раѓање и мајчинство во областа на работните односи.

Абдула нагласи дека Комисијата примила повеќе од 21 претставка од бремени жени, главно во случаи кога тие биле ангажирани со договори на определено време.

– Посебно интересно е тоа решенијата за прекинување на работниот однос ги добиваат кога работодавецот дознава дека тие веќе имаат намера да забременат или се веќе во фаза на бременост и во тој случај работодавецот го прекинува договорот за работа и ги става во една многу неповолна и несакана положба жените кои се во фаза на забременување или веќе се бремени – рече Абдула.

Тој додаде дека работата и работните односи се најзастапена област во претставките пред Комисијата, со околу 30 проценти од вкупниот број случаи што ги разгледува КСЗД.

На брифингот беа презентирани и прелиминарните резултати од истражувањето за сексуално вознемирување на работното место во образованието, спроведено во рамки на проектот „VIOLET“.

Истражувањето опфатило 1.057 вработени од 26 основни и средни училишта во 19 општини и сите осум плански региони во државата.

Според наодите, сексуалното вознемирување најчесто се појавува во вербална форма, а жените, техничкиот и административниот кадар се најизложени.

Како најчести форми се нотирани навредливи сексуални шеги и коментари, кои ги доживеале 5,5 проценти од анкетираните, непожелни дискусии за секс со 4,8 проценти и гледање со сексуална намера со 4,2 проценти.

Истражувањето регистрира и потешки облици на вознемирување. Несакан допир пријавиле 2,9 проценти од испитаниците, импликации за напредување во замена за сексуални услуги 2,1 процент, закани со одмазда поради одбивање 2 процента, додека 1,7 проценти пријавиле сексуален напад или однос без согласност.

Според податоците, жените се почесто изложени на сите форми на сексуално вознемирување, особено кога станува збор за злоупотреба на моќ и принуда.

И покрај овие наоди, во изминатите четири години пред КСЗД биле поднесени само две претставки за сексуално вознемирување. Во едниот случај постапката била запрена, додека вториот бил препратен до надлежното Основно јавно обвинителство.

Од Комисијата оценуваат дека тоа укажува на потребата од поголема информираност за механизмите за заштита, но и охрабрување на жртвите и сведоците да ги користат достапните механизми за пријавување. (МИА)