Ако ескалира ситуацијата со цената на горивата, Владата ќе ги преземе сите мерки за да го ублажи ризикот кон граѓаните – рече денеска министерката за енергетика, рударство и минерални суровини, Сања Божиновска.
Одговорајќи на новинарски прашања, Божиновска напомена дека ситуацијата внимателно се следи.
– Тоа што се случува е на светско ниво. Како што следиме сите, секаде цените се покачени. Значи, тоа е виша сила, војна врз која ние не можеме да влијаеме. Минатата недела имавме вонредна онлајн-седница на Влада и откако почна сè, уште од март, направивме и акциза и намалување на ДДВ-то и со „Окта“ договоривме попуст. Го намаливме ДДВ-то на 10 проценти. Дискутираме, гледаме и ќе се консултираме на ниво на Влада. Влада имаме во вторник, ќе видиме како понатаму. Ние секако сме за заштита на стандардот на граѓаните, меѓутоа ќе мора да разгледаме кои се и фискалните импликации врз буџетот. Ќе знаеме набргу – истакна Божиновска на прес-конференција.
Таа потврди дека во моментот има само една мерка.
– Да, намалување на ДДВ-то од 18 на 10 проценти. Како што знаете, може да има и други намалувања. Тоа постои како мерка, Министерството за финансии ги прави фискалните мерки и ги донесува заедно на Влада – потенцира министерката.
Владата, информира, засега не преговара повторно со „Окта“ за попуст.
– Не сме почнале, меѓутоа ако ситуацијата ескалира и понатаму, ќе ги преземеме сите мерки за да го ублажиме ризикот кон граѓаните – рече министерката Божиновска. (МИА)
