Поранешниот сенатор од американската сојузна држава Минесота и долгогодишен матичен лекар, д-р Скот Џенсен (Dr. Scott Jensen), излезе со нови жестоки обвинувања на сметка на долгогодишниот главен медицински советник на Белата куќа, д-р Ентони Фаучи. Џенсен, кој е дипломиран доктор по медицина со повеќе од четири децении пракса, побара итно кривично гонење на Фаучи, тврдејќи дека тој свесно го измамил американскиот Конгрес и јавноста во врска со финансирањето на контроверзните лабораториски истражувања околу коронавирусот со американски пари.

Кој е д-р Скот Џенсен?

Д-р Џенсен е добро позната фигура во американската јавност како политичар од Републиканската партија (служеше како државен сенатор во Минесота од 2017 до 2021 година и беше кандидат за гувернер во 2022 година). Сепак, неговата глобална препознатливост дојде за време на пандемијата со КОВИД-19. Како лекар од праксата, тој стана еден од најгласните критичари на официјалните здравствени политики во САД, рестриктивните мерки и официјалните протоколи на СЗО и Центарот за контрола на болести (CDC). Поради неговите тврдења — вклучително и тоа дека болниците биле финансиски мотивирани вештачки да го зголемуваат бројот на починати од КОВИД-19 — тој постојано беше под лупа на медицинските здруженија, но успеа да ги задржи своите лиценци за работа и ја зацврсти својата позиција на бунтовник против медицинскиот естаблишмент.

Контекст: Новите сознанија за Ентони Фаучи

Обвинувањата на Џенсен доаѓаат во период на зголемен притисок за преиспитување на она што го остави Фаучи во здравстениот систем. Реакциите и барањата за негово гонење за злоупотреби не стивнуваат. Катализатор за најновиот бран критики се стотиците документи кои неодамна ги објави Тулси Габард, директорката на Националното разузнавање на САД. Според критичарите, овие документи непобитно докажуваат дека американските власти со пари на даночните обврзници финансирале т.н. „gain-of-function“ истражувања (модификација на вируси за да станат позаразни и поопасни), нешто што Фаучи претходно строго го негираше пред Конгресот.
Иако д-р Фаучи претходно доби помилување од претседателот Џо Бајден, тоа го штити само од сојузно кривично гонење, но не и од граѓански тужби или потенцијални процеси во поединечните 50 американски сојузни држави.

Врз основа на овие информации Џенсен вели дека Фаучи не направил само злоупотреби на американските пари, туку „играјќи со корона вирусот“ тој всушност учествувал во геноцид. Во своето последно видео обраќање на Фејсбук, поранешниот сенатор во Минесота и доктор вели дека Фаучи си играл како да е самиот Бог, а за тоа мора да следуваат обвинувања.

„Тони Фаучи ги лажеше Американците. Тони Фаучи треба да биде кривично гонет. Истражувањата за „зголемување на функцијата“ навистина се случуваа. И тоа длабоко ме растажува. Во изминатите шест години си навлеков многу неволји со тоа што гласно го кажував она за што се молчеше. Еве, пак гласно го кажувам она за што се молчи. Тони Фаучи учествуваше и помогна во финансирањето на истражувањата за создавање поопасен и позараен вирус („зголемување на функцијата“) и тој треба да биде кривично гонет“, коментира Џенсен.

Обраќањето на д-р Скот Џенсен: „Ова не е Америка во која јас израснав“

Во продолжение ви го пренесуваме комплетното обраќање на д-р Скот Џенсен:

„Тони Фаучи треба да биде кривично гонет. Дозволете ми да одвојам неколку минути за да ви кажам зошто ова ми значи толку многу и зошто треба да им значи толку многу на Американците ширум земјата. Тони Фаучи го доведе во заблуда Конгресот. Тој ги доведе во заблуда граѓаните на Америка. Поконкретно, Тони Фаучи изјави дека не бил вклучен во финансирањето на истражувања за „зголемување на функцијата“ (gain of function) на вирусите.

Во текот на изминатите неколку дена, Тулси Габард, како директорка на Националното разузнавање, објави стотици документи кои јасно покажуваат дека имало финансирање на истражувања за зголемување на функцијата со парите на американските даночни обврзници и дека тоа било прикривано. А Тони Фаучи бил клучен играч во тоа. Можете да ја прашате вашата вештачка интелигенција дали постои сè поголема загриженост во Америка дека Тони Фаучи навистина ги измамил Американците, и ќе видите дека тоа е така.

Зошто ова е толку важно? Прво, што е тоа истражување за „зголемување на функцијата“? Класичната дефиниција за зголемување на функцијата е зголемување на заразноста и зголемување на опасноста. Со други зборови, да се направи една болест полесно да се шири и да наштети или да убие повеќе луѓе.

Но, постои и друг аспект на „зголемувањето на функцијата“ и Тони Фаучи го знае тоа, но постојано го заобиколуваше. А тоа е — што се случува кога го користите истражувањето за зголемување на функцијата за да таргетирате одредена група луѓе, етничка група, група која не ја сакате во близина? Што е со етничкото чистење во нација од Третиот свет? Мислите дека тоа не е возможно? Возможно е. Кога мислам на зголемување на функцијата (gain of function — GOF), мислам на буквите Г, О и Ф (G, O, F).

Буквата Г (G) означува Бог (God), генетика (genetics) и геноцид (genocide). Кога почнувате да си играте со Божјата креација за тоа што е човекот со своите 46 хромозоми, и кога почнувате да ја менувате генетиката преку истражувања за „зголемување на функцијата“, ризикот од геноцид го правите пореален.

Што означува буквата О (O)? Таа означува надзор наспроти забранети зони (oversight versus off limits). Да не се залажуваме. Не постои соодветен надзор врз вирус кој е надвор од контрола. Не треба да има никаква дилема — ова е забранета зона. Истражувањата за „зголемување на функцијата“ со цел вирусите да таргетираат етнички групи, да станат попреносливи, поопасни и повирулентни — ова на меѓународно ниво е идентификувано како нешто што не смее да се случува. А сепак, Америка учествуваше во тоа.

И на крај, буквата Ф (F). Тоа го означува она што во медицината го нарекуваме „одбегнат агент“ (fugitive agent). Со други зборови, ако создадете нешто што не може да се задржи, не може да се ограничи — слично како што не можете да го вратите духот назад во шишето — вие сте создале неконтролиран, „одбегнат агент“. А „одбегнатиот агент“ создаден од човек потенцијално би можел да му наштети на човечкиот род со векови понатаму.

Помислете на големите сипаници (smallpox). На меѓународно ниво, ширум светот, утврдивме дека големите сипаници се искоренети. Па сепак, постојат најмалку две лаборатории во светот, една во Русија и една во Соединетите Држави, кои сè уште чуваат активен вирус на големи сипаници кој би можел да предизвика друга епидемија или пандемија. Тој се чува на безбедно во случај некогаш да затреба за имунолошки цели или можеби за одбрана на луѓето од некој новосоздаден или новопојавен вирус. Меѓутоа, и покрај тоа што големите сипаници се искоренета болест, ампули со овој вирус беа пронаоѓани во изминатите 20 или 30 години. И кога беа пронајдени, тие веројатно беа соодветно уништени. Но, ја сфаќате поентата. Кога зборувате за потенцијални пандемични вирусни убијци, мора да признаете што се случува.

Тони Фаучи ги лажеше Американците. Тони Фаучи треба да биде кривично гонет. Истражувањата за „зголемување на функцијата“ навистина се случуваа. И тоа длабоко ме растажува. Во изминатите шест години си навлеков многу неволји со тоа што гласно го кажував она за што се молчеше. Еве, пак гласно го кажувам она за што се молчи. Тони Фаучи учествуваше и помогна во финансирањето на истражувањата за зголемување на функцијата и тој треба да биде кривично гонет.

Сфаќам дека доби помилување од претседателот Бајден, но не доби помилување за граѓански судски спорови и не доби помилување од поединечните 50 сојузни држави. Ова е проблем. Ја ценам Тулси Габард за објавувањето на документите.

Ве молам, сфатете колку е ова важно. Ова не е Америка во која јас израснав. Замислете ваквото истражување да не беше правено со коронавирусот, туку со вирусот „ебола“, и да дојдеше до истекување од лабораторија. Замислете го тоа“, завршува Џенсен во своето последно видео обраќање на Фејсбук. ма/дј

фото: ФБ профил на Џенсен и принтскрин

линк до оригиналното видео: https://www.facebook.com/reel/1318448690483943