Незадоволството кај земјоделците со откупот на годинашниот род продолжува и во Тиквешко, каде што синоќа лозарите најавија блокади на патишта поради нерешени проблеми со откупот.
Проблеми имаше со откупот на лубеници, па со пченицата, потоа следеа проблеми за производителите на праски и сливи, а како наближува сезоната на бебра на винското грозје, нерешените проблеми во земјоделството ги погодуваат и производителите на грозје.
Синоќа лозарите од Тиквешко имаа состанок на кој разговараа за ниските цени кои винарите ги нудат за грозјето, па одлучија да протестираат против игнорантскиот однос на винарските визби. Претседателот на Здружението „Напредни лозари“, Трајче Кулев утринава на прес-конференција соопшти дека се бара масовна поддршка од производителите на грозје и доколку ја добијат, ќе се организираат протестите.
– Нема напредок во преговорите со винарите околу цените. Ние сме во загуба. Тие ги нудат истите цени од 11 и 13 денари за килограм „смедеревка“ и „вранец“, а ние бараме реални 15 до 17 денари за овие најзастапени сорти, информираше тој, соопштувајќи и дека се уште е актуелен и проблемот со винарските визби кои не доисплатиле грозје од претходни реколти.
Кулев ги повика лозарите да се обединат и со потпис да дадат поддршка за организирање на протестите, како израз на незадоволство од откупните цени за годинешниов род. Затоа што, како што нагласи, ако грозјето се плати поскапо, ќе живне и градот.
Претседателот на Здружението на лозари рече дека ќе си поднесе оставка, доколку не добие масовна поддршка од лозарите за протестите кои се планираат.
