Американскиот претседател Доналд Трамп изјави дека наскоро планира да разговара со рускиот претседател Владимир Путин за смртта на лабораториска асистентка во истражувачки центар за проучување на чумата во Сибир, но Кремљ соопшти дека таков разговор сè уште не е суштински договорен, јави Би-би-си.

– Засега водиме многу длабоки разговори – рече Трамп, додавајќи дека „веројатно“ в четврток, на 8 октомври, ќе може да извести за разговорите со Путин.

Постојаните шпекулации за смртта на лабораториската асистентка предизвикаа контроверзии меѓу Русија и Соединетите Американски Држави, вклучувајќи и прашања за можно ширење на болеста надвор од Русија. Американскиот државен секретар Марко Рубио изјави дека САД имаат „мерки“ со кои би можеле да ѝ помогнат на Русија доколку се покаже дека ситуацијата е посериозна отколку што се тврди.

Портпаролот на Кремљ, Дмитриј Песков изјави дека доколку Соединетите Американски Држави преземат иницијатива за разговор меѓу Владимир Путин и Доналд Трамп, разговорот ќе биде брзо организиран. Тој, сепак, додаде дека засега телефонски разговор меѓу претседателите не е суштински договорен.

Генералниот директор на Светската здравствена организација (СЗО), Тедрос Аданом Гебрејесус, ја повика Русија на транспарентност.

– Навременото, целосно и транспарентно споделување информации во согласност со меѓународните здравствени регулативи е важно за разјаснување на спротивставените извештаи и за обезбедување точна проценка на потенцијалните ризици по јавното здравје – рече Гебрејесус.

Руските власти соопштија дека ја истражуваат причината за смртта на 28-годишната жена, идентификувана во руските медиуми како Дарја Шипилова, која наводно се разболела неколку дена пред да почине. Тие наведоа дека сите лица кои биле во контакт со починатата биле негативни на тестовите и ги минимизираа извештаите, соопштувајќи дека жената починала од „пневмонија со неодредена етиологија“. Со тоа тие не потврдија дека станува збор за сомнителен случај на белодробна чума – сериозна инфекција на белите дробови што често се опишува како највирулентна форма на чума.

Првите извештаи се појавија во петокот, кога беше соопштено дека речиси 200 лица биле ставени под медицински надзор во Иркутската област во Сибир по смртта на жената. Непотврдени извештаи сугерираат дека таа се разболела откако скршила епрувета со патоген во институтот за борба против чумата во Сибир, каде што работела, или по патување во регион каде што чумата природно се појавува кај дивите глодари.

Според СЗО, белодробната чума има многу краток период на инкубација – понекогаш само 24 часа – и може да биде смртоносна доколку не се дијагностицира и лекува навреме. Симптомите вклучуваат отежнато дишење и кашлица, често проследена со искашлување крвав секрет. Бактеријата што ја предизвикува чумата, Yersinia pestis, се наоѓа кај глодарите во тој регион, како што се мрмотите.

Институтот за борба против чумата во Сибир бил основан пред нешто повеќе од 100 години, во 1920-тите години, токму како одговор на епидемија на чума. Во 14 век, кога чумата била позната како „Црна смрт“, таа однела животи на речиси половина од населението во Европа.