Македонското судство го допре дното пресликувајќи ги двојните аршини, непринципиелноста и неморалноста на Зоран Заев и Стево Пендаровски, реагира денеска опозициската ВМРО-ДПМНЕ, за пресудите кои ги носата македонските судови.
– Политичкиот прогон стана пракса за справување со политичките противници на заевизмот. Оние кои први го крена гласот против неговите погубни политики беа првите жртви на заевизмот. Срамен е фактот што повратниците од војните на Блискиот Исток, терористи кои се бореле на страната на ИСИЛ, кои егзекутирале луѓе на идеолошка основа, добија затворски казни од 6 години, три пати помали казни од оние кои им беа изречени на полициските службеници во политички монтираниот случај 27-ми април. Припадниците на ИСИЛ добија помали казни од патриотите и припадниците на македонските безбедносни сили кои животот го посветиле во одбрана на Република Македонија кои добија 211 години затвор и беа прогласени за терористи, реагира ВМРО-ДПМНЕ.
Политичките затвореници, се додава во соопштението, не се одлика на една демократска држава, аспирант за членство во ЕУ.
– Македонија е единствена држава во демократска Европа која има политички затвореници во своите затвори. Како и пресудите така и притворите во политичката монтировка наречена 27-ми април се уште едно грубо прекршување на основните човекови права и правните начела. Притворите за осудените се неосновани и неважечки со оглед на фактот што во моментот се уште се на сила паричните гаранции кои ги дадоа обвинетите. Пендаровски е само опачина на Заев, другото лице на заевизмот, симбол за неправда и политички терор. Човек како и Заев со неконзистентни ставови, политички макијавелист чија политичка кариера е изградена на ноторни лаги. Победата на професорката Гордана Силјановска Давкова ќе го означи почетокот на враќањето на правда во Македонија, почетокот на крајот на заевизмот, се вели во соопштението.
