Бугари во Албанија нема, има само Македонци од кои ненародната власт се откажува, се вели во реакцијата на потпретседателот на ВМРО-ДПМНЕ, Александар Николоски во врска со најавената посета на бугарската потпретседателка Илијана Јотова на Република Албанија.
– Кога Македонија не работи, ќе работи асимилаторската политика на Бугарија! Наместо да ги спроведе пресудите на Европскиот суд за човекови права од Стразбур со кои се бара признавање на Македонците во Бугарија и нивното право на здружување и мајчин македонски јазик, Бугарија бара непостоечки Бугари во Албанија, купувајќи ги душите на луѓето кои се напатени и измачени и живеат во тешка сиромаштија во Албанија, нудејќи им бугарски пасоши со кои можат да одат во побогатите земји на ЕУ по парче леб. Таа е вистината!- вели Николоски.
Тој во својата објава на Фејсбук додава:
-Бугари во Албанија нема, има Македонци кои матичната држава Македонија не ги штити и ги остава сами на себе. За брзо време ненародната власт на СДСМ и ДУИ во Македонија ќе падне и Македонците и во Албанија и во цел свет ќе бидат со гордо крената глава, објави Николоски.
Како што објавивме, Јотова од денеска до 16 септември ќе престојува во Република Албанија во пресрет на националниот попис на населението во Албанија. Јотова е планирано во Елбасан да отвори неделно училиште на бугарски јазик, да промовира книга „Бугари во Албанија“ и други активности.
