По заканата на Никола Димитров дека ќе го тужи порталот „Република“ ако не го повлече текстот со чиј наслов неговото име се доведува во врска со аферата „Рекет“, наведувајќи дека тој нема допирна точка со настанот, а откако пред извесно време на ФБ се пофали дека имал некакво претчувство во врска со Боки 13, се огласи пратеникот Антонио Милошоски. Тој на ФБ напиша:
„Никола Димитров можно е да имал претчувство за Боки Тредичи, но независно од ваквите лични супер-моќи, министерот за надворешни за скандалот Рекет бил информиран во првото тромесечие од 2019-та, лично од еден нерезидентен амбасадор, претставник на една од поновите членки на ЕУ, чиј близок соработник во Македонија (познат стопанственик) бил исто жртва на изнуда на пари од рекетарско-обвинителската екипа на власта!
Прашањата кои можат да ја интересираат јавноста и обвинителството се:
1. Кога министерот Димитров ја добил информација од нерезидентниот амбасадор за мега скандалот „Рекет“?
2. Дали Димитров сознанијата за „Рекет“ ги споделил со Јавното обвинителство или можеби ја информирал Владата на затворена седница?
3. Доколку не ги информирал ниту Обвинителството, ниту Владата, зошто министерот Димитров одлучил да молчи, да не ги пријави сознанијата за Рекет, и да не ја информира јавноста?
Право на МНР Димитров е да си одлучи дали ќе тужи новинари за објава на документи во кои неговото име се споменува во контекст со аферата Рекет. Но, пред да го направи тоа, корисно би било пред обвинителството да даде исказ за конкретните информации кои, во врска со оваа криминално-политичка афера, ги добил од нерезидентниот амбасадор на земја членка на ЕУ во првото тромесечие од годинава!“, тврди Милошоски.
