Добар дел од источниот и средниот дел на Франција вчера и денеска се најдоа во необична атмосферска состојба, во која доминираше небото со жолтеникава светлина, а автомобилите беа прекриени со жолт песок. Причината за ова се честички од песок од Сахара, јави дописникот на МИА.
За да го објасни овој феномен, Метето Франс објасни дека ова е последица од песочната бура која во последните часови дува во пустината Сахара, во Мароко. Многу изразениот јужен тек ги испрати честичките од песок во атмосферата, а потоа депресијата на Балеарските Острови дозволи песокот да се крене многу подалеку на север, до Франција, па дури и до Бенелукс.
Ситниот дожд потоа ги спушти зрната песок на земја паѓајќи врз автомобилите и улиците.
Од истиот бран од Сахара погодени се и делови на Шпанија.
Неколку слични епизоди се случија минатата година. Жолтото небо беше особено видливо на почетокот на февруари 2021 година, поради ниското зимско сонце.
