Рускиот претседател Владимир Путин во синоќешниот разговор со својот турски колега Реџеп Таип Ердоган ги осуди, како што вели тој, нападите на гасоводите Северен тек 1 и 2 во Балтичкото Море и според него тие се чин на меѓународен тероризам.
Во телефонскиот разговор со Ердоган, рускиот претседател ги изрази своите размислувања за невидените акти на саботажа, всушност меѓународен тероризам против „Северен тек 1“ и „Северен тек 2“, се наведува во соопштението на Кремљ.
Шведската крајбрежна стража вчера информираше за четврто истекување гас во Балтичкото Море над гасоводот „Северен тек“.
Европа експресно оцени дека тоа е саботажа. Москва повика на истрага.
Гасоводите „Северен тек 1 и 2“ не работат, но во цевките има гас.
НАТО вчера изрази длабока загриженост поради оштетувањето на гасоводот и предупреди дека секој намерен напад врз инфраструктурата на сојузниците ќе биде проследен со унифициран и решителен одговор.
На барање на Москва за денеска е закажан итен состанок на Советот за безбедност на ОН токму на оваа тема.
