Шефицата на дипломатијата на Бугарија, Екатерина Захариева вели дека „најголемиот проблем во односите со С. Македонија се недоволните гаранции за спроведување на Договорот за добрососедство“.
Во интервју за германскиот јавен сервис АРД што е објавено вчера, Захариева вели дека Софија нема да даде зелено светло за почеток на пристапните преговори се’ додека тие гаранции не станат дел од Преговарачката рамка.
– Бугарија сака да биде признаена историската вистина. Тоа не беше проблем за С. Македонија кога се потпишуваше Договорот – тоа заедничко минато кое треба да не’ поврзува, а не да не’ разделува. „Ние не велиме: Овие херои се само наши. Ние велиме: Тоа се заеднички херои. Тоа е модерно размислување на две земји, особено доколку сакаат да бидат заедно во ЕУ. Не може секојпат кога некој во С. Македонија јавно ќе каже дека некој од овие херои бил Бугарин, да биде јавно линчуван. 30 години по падот на тоталитарните режими, тоталитарните методи и пристапи не смеат да бидат државна политика, вели Захариева.
Следна забелешка која ја акцентира Захариева се „историските учебници во С. Македонија“.
– Во учебниците во С. Македонија Бугарите се’ уште се претставени како фашисти. Како би се чувствувале вие, кога 75 години по војната некој се уште би ве претставувал како фашист?- прашува Захариева.
Таа натаму бара вметнување на бугарските барања во Преговарачката рамка, иако тоа беше одбиено од актуелниот претседавач со ЕУ, Германија.
– Не сакаме да ја блокираме С. Македонија. Но доколку во Преговарачката рамка немаме никакви гаранции, невозможно е да се каже ‘да’. Сеедно дали од сегашното или идното претседателство на ЕУ, доколку нашите предлози бидат ставени за дискусија во Преговарачката рамка, Бугарија ќе биде во можност да каже ‘да’, вели бугарската министерка.
Таа додава дека со тоа нема да се направи преседан во ЕУ.
– Северна Македонија очигледно не е подготвена, договорите за пријателство, добрососедство и соработка да бидат надгледувани и да станат дел од Преговарачката рамка. Кога некој во С. Македонија вели дека ќе се придржува до договорот со Бугарија, иако во моментов не го почитува, зошто е проблем, добрососедските односи – еден хоризонтален мастришки критериум – да се вметнат во Преговарачката рамка? Постојат такви текстови во Преговарачката рамка на Хрватска. Тоа не е преседан“, вели Захариева.
Извор: Дојче веле
