Непосредно по објавувањето на резултатите од претседателските избори, неколкуте стотици демонстранти, главно млади „антифашисти“ и „антикапиталисти“, протестираа против реизборот на Емануел Макрон во неколку градови во Франција, обележани со инциденти во Рен, како и во Париз, јави дописникот на МИА.

Набргу по објавувањето на победата на Макрон над Марин Ле Пен, во Рен, околу 250 луѓе се собраа под транспарентот: „Она што нема да го поминеме низ гласачките кутии, ќе го добиеме преку улица“. Собир одржан и покрај забраната и воочливо големо полициско присуство. Демонстрантите запалија неколку канти за ѓубре, принудувајќи ги пожарникарите да интервенираат три пати, според префектурата која ги забрани демонстрациите.

Полицијата употреби солзавец во близина на каналот што го минува Рен. „Сакаме да демонстрираме за да покажеме дека Ле Пен воопшто не ја сакаме, но не го сакаме ниту Макрон“, изјави една учесничка на демонстрациите. „Мораме да се организираме за да најдеме контрасила“. Двајца демонстранти беа уапсени во средината на вечерта, соопшти префектурата.

Во центарот на Париз, 250 до 300 демонстранти „антифашисти“ демонстрираа со извици, особено „Оди си Макрон“, понекогаш судирајќи се со полицијата која ги напаѓаше. Заминувајќи од Халите, тие извикуваа „Марин Ле Пен, одвратно е“ и „Ману Макрон, одвратно е“ или „Макрон, оди си!“, се до Плоштадот на Републиката, обезбеден од големи полициски сили. Попатно беа превртени велосипеди, скутери и канти за ѓубре, а неколку проектили беа фрлени врз камиони на органите на редот. Статуата на Републиката беше испишана со графити како „Светот гори“.

Во центарот на Нант, поворка од околу 400 до 500 луѓе тргна зад транспарент со натпис „Потреба од револуција“. Во Тулуз, околу 500 луѓе исто така учествуваа на демонстрациите чиј слоган беше „Ни Макрон, ниту Ле Пен, револуција“. „Доста е, доста е ова општество, кое лови имигранти без документи и го става Земур на телевизија“, пееја тие.

Полицијата застрела две лица во Париз

Синоќа, нешто пред полноќ, додека толпата која дојде да го бодри Емануел Макрон на Шан де Марс за неговиот реизбор се растера, две лица беа застрелани од полицијата неколку километри подалеку, додека возеле во спротивна насока. Инцидентот се случил на Понт-Неф, во 1-виот арондисман во Париз. Третиот патник на возилото е повреден, јави дописникот на МИА.

Инцидентото се случил во хиперцентарот на главниот град на мостот Понт-Неф, во срцето на Париз, во 1-виот арондисман, недалеку од музејот Лувр. Овој мост, најстар во Париз, се протега над Сена и поминува низ Ил де ла Сите.

Нешто пред полноќ, полицајци забележале автомобилот кој возел во погрешен правец. Тие се обиделе да го контролираат возилото, залудно. Токму во тој момент возачот на возилото забрзал, па дури и се обидел да удри во полицајците, како што изјавил полициски извор за агенцијата Франс прес, пренесуваат француски медиуми.

Соочени со ризик од судир, полицијата го употребила своето огнено оружје. Двајца патници во возилото Фолксваген Поло регистрирано во Париз загинаа, а третиот е повреден.

Набргу по настанот, околу мостот беа распоредени големи полициски сили.

Отворена е истрага и доверена на 1-виот округ на правосудната полиција за „обид за намерно убиство врз лица кои имаат јавни овластувања“, соопштија од париското обвинителство.

Истрага е отворена и од Генералниот полициски инспекторат (ГПН). Така е секогаш кога полицаец го употребува своето оружје. Иако делото се случи неколку часа по резултатите од вториот круг на претседателските избори, во оваа фаза не може да се воспостави врска со овој политички настан.